Mizoram Youth Commission (MYC) chuan kum danga a lo tih tawh thin angin  November 18 – 22, 2019 chhung a Aizawl a Sipai Lak Runpui neihna atan kumin July thla atang khan inbuatsaihna a kalpui tan a. Mizo thalaite tan hna nghet leh hna tha a luh theihna a nih avangin, Indian Army Pre-Recruitment Training buatsaih nan MYC chuan Aizawl Centre, Lunglei Centre leh Mizoram Southern Zone Centre, Siaha atan Assam Rifles thawhpuiin, Mizoram Northern Zone Centre, Vairengte atan khawvel hriat tham khawpa Army leh Commando training neihna hmunpui Counter Insurgency Jungle Warfare School (CIJWS) leh Kolasib District SAINIK te thawhpuiin, kum dang zawng aia changtlung zawk leh hmasawn zawkin MYC chuan he Pre-Recruitment Training hi September 2019 atangin hlawhtling takin a kalpui a, hemi atana hmalakna atan hian MYC Chairman Dr. Vanlaltanpuia chuan Assam Rifles Brigadier leh CIJWS hotu Major General te a sawipui hnu ah MYC chuan hma a la a ni.

Tunah hian Physical test leh Medical Test neih tawh niin, Medical test paltlang hi mi 97 awmin, referred hi 50 chuang an awm a, hengresult hi la ngaihchan mek zel a ni. Written test inbuatsaih nan a hranpa in MYC chuan mithiam a chhawr a, MYC Training zawmtu written test hmachhawn tura tlingte chu heng MYC Faculty Member-te hian nakkum January 2020-a Written Test neih hma zawng uluk takin coaching an pe zui zel dawn bawk a ni.