Officers' Club Lawngtlai (OCL) te chuan November ni 21, 26 & 27 te khan Lawngtlaia higher secondary school pakhat - Govt Region Higher Secondary School-ah leh high school pathum - Govt Region High School, Downtown English School leh ML Junior English School-ah te zirlaite an hma lam hun atana kaihruai turin career guidance programme an buatsaih.
OCL President, Lawngtlai Additional DC Pu B. Lalchhawntluanga leh Sr Vice President, Lawngtlai DSO Pu R. Lalbiakthanga te kaihhruaia he hun hman thinah hian Information Secretary, Lawngtlai DIPRO Pu C. Lalhruaitluanga'n inhmel hriattirna hun a hman thin bakah, resource person hrang hrangte'n zirlaite hma lam hun atana kaihruai thei tur thupui hrang hrang an sawi thin hlawm a ni.
Officers' Club Lawngtlai hi Lawngtlai District chhunga central leh state sawrkar hnuaia thawk officer-te'n anmahni hna pangngai piah lama ram leh khawtlang tana rawng bawlna zau zawk an neih theih nana an intel khawmna niin, September 2017 khan din thar leh a ni a. Sum thawh khawmin Krismas vuakvetah mi harsate leh tanpui ngaite an tanpui thin bakah, zirlaite tan career guidance programme te an buatsaih thin a ni.
Kumin hian Krismas Ur Lawk leh Charity Ride te hma chhawp la neiin, career guidance programme pawh kum thar lamah sikul hrang hranga la buatsaih chhunzawm zel an tum a ni.
