Novel Coronavirus darh zau zel lakah Mizoram leh hmarchhak  state dangte kan la him a. Mizoramah he virus hi a lo luh lohna turin Mizoram Sawrkar chuan tan a la a, Chief Minister hova March ni 9, 2020 a meeting thurel bawh zuiin State Level Task Force on Mitigation of Coronavirus (COVID-19) din nghal niin vawiin khan Aizawl SP Conference Hall-ah an Chairman Pu Lalnunmawia Chuaungo, Mizoram Chief Secretary hovin meeting pawimawh tak neih a ni. 

Mizoram Chief Secretary chuan he virus hlauh avanga mipuite chiai lo turin a chah a. Tun thlengin Mizoram mipuite zingah emaw Mizoram rawn tlawhtute zingah he natna hrik pai hmuhchhuah an la awm lo, a ti. Mipui nitin mamawh khaihlak mai tur anga thuthang pawh thu belhchian dawllo a ni tiin mipui mamawh buhfai, gas, petrol leh diesel te pawh stock a tam tawk a, heng mamawh thil te hi chatlak lova lakluh zel a nih avangin harsatna tur a awm lo. Buhfai phei chu thla thum tla Mizoram chhung kudamah dah khawm sa a awm, Pu Lalnunmawia Chuaungo chuan a ti a. Mamawh phurtu motor-te pawh chatlak lovin Mizoramah a lo thleng reng tih a sawi a. Hetihlai hian he natna hrikin Mizoram a thlen lohna tur erawh chuan uluk leh khauh taka hmalak mek a nih thu leh ruahmanna hrang hrang chipchiar taka duan a nih thu a sawi bawk.

Myanmar leh Bangladesh ram riah  Zokhawthar leh Kawrpuichhuah tihloh inkalpawhna hmun dang zawng zawng chu thu leh awm hma chu khar a ni a. Ramri kana kal an awm lohna turin Assam Rifles te leh Mizoram Police te leh a khaw mipuite tangtlangin venna hna an thawk dawn a ni. Zokhawthar leh Kawrpuichhuahte hi venhimna hna thawktuten englai pawhin an thutchilh ang a, ram ri kana lo lutten he natna hrik hi an pai em tih uluk taka endik hna medical team ten an thawk dawn bawk a ni. COVID-19 natna vei ni awma ngaih medical team ten an hmuhchhuah chu Mizoram luh phalsak an ni lovang. Mizoram mi leh sa, ramri kana Mizoram lo lut tur te zingah covid-19 symptom nei an nih chuan dah hranna hmun (quarantine facility)-ah dah an ni ang. 

Lengpui Airport-ah pawh zin veivakte endik hna hi uluk taka kalpui a ni a. He natna vei nia rinhlelh te chu Lengpui Tourist Lodge-ah dah hran an ni ang. 

Tripura leh Mizoram in rina Kanhmunah te, Assam ri Vairengte leh Bairabi bakah Manipur ri Khawkawnahte inkalpawh theih a ni dawn a. Heng hmun li sawrkarin a ruatbik te tih loh State thenawmte nena inkalpawh theihna hmun dang zawng zawng chu venhimna khauh tak nen khar vek a ni.

Transport Department kaltlangin Mizoram pawna kal tur te leh Mizoram chhunga Maxicab emaw Bus emaw hmanga zin veivakte chu an hming, kum, address leh phone number chiang taka chhinchhiah vek a ni dawn a. Heng zin veivakte zingah hian COVID-19 vei hmuhchhuah an awm palh thulhah an chuanpuite leh an mi hmuhte chhui zui awlsam theih nana ruahman a ni. Ramdang mi (foreigner)-te chu thu leh awm hma chu Mizoramah lut rih lo tura tih an ni.

Meeting chuan tul bik thilah tih loh chuan mipuite Mizoram pawna zin chhuak  tlem turin thurawn a pe a. Sawrkar Department zawng zawngte puipunna lian tham – conference, kut leh thildangte siam rih lo turin a ti a. Kohhran leh pawl dangte pawh hun engemawti chhung chu a theih chin chinah inkhawmpui lian tham ko rih lo turin a ngen a ni.