Infiamna ngaina tak Mizote'n infiamna kan ngainat ber chu football hi a ni a, he game hi Mizo mipa tawh phawt chuan kan khel a ni deuh ber mai. Mizo zingah chuan football tuipui lo hi an vang hle mai a, a hmei a pain he game hian min luhchilh a, ke nei zawng zawng chuan ball kan pet deuh vek a, tunah phei chuan TV lamah an chhuah tha ta bawk nen, inkhel chhuah loh zan chuan kan nun a kim lo a ni ta thawthang mai. Chuvangin infiamna tam tak zingah football kan thur chhuak dawn.
A bul tanna
Mizote hian tun hnaiah football hi tuipuiin buaipui viau mah ila, kan khelh tanna hi a la rei lo hle mai a, mumal takin kum 50 vel bak kan la khel meuh lo. Assam sorkar hnuaia District pakhat mai kan nihlai kha chuan awmze neiin kan la inkhel meuh lo va, 1954-a Aijal Sports Association an din kha Mizoram football chanchinah chuan hun chhinchhiahtlak a ni. Aijal Sports Association hian football chu a hmalakna hmasa ber pakhatah a hmang a, Aijal Sports Association President hmasa ber, Pu Sangliana (L) Ex MP, General Secy. HK Bawihchhuaka (L) leh Treasurer hmasa ber Pu Lalhmingthanga (L), P&Sons-te leh hruaitu hmasate'n Mizoram football kawng an lo sial tan a.
1972-a Union Territory kan nih hma khan football lamah hian hnuhma lian tak kan nei lem lo va, Chhota Lal Seth Football Shield leh Pachhunga Memorial Football Trophy erawh hlawhtling takin an lo khel tawh thin. Mizoram pawna Mizote an champion hmasak ber chu 1962 kha a ni a, hemi kum hian 1st RK Jain Memorial Football Tournament-ah Aizawl XI an champion. UT nih hnuah Aijal Sports Association chu Mizoram Sports Association-ah thlak a ni a, he pawl hnuaiah hian 1973 khan football pawh a hrangin a lo ding ve tan ta a, hei hi Mizoram Football Association pawhin an din tan kumah an pawm ta nghal a, 1976 a tang khan mumal taka inthlanna buatsaih a ni a, Football Association mumal tak kan nei tan a, MFA President hmasa ber chu Pu Lal Thanhawla (Ex Chief Minister) hi a ni.
India-in min hre ta
1972-ah Mizoramin politics lamah bung thar a kai a, Union Territory-ah hlankai a ni a, chutiang bawkin Mizoram Football Association thar a ding. 1986-ah Mizoram chu State puitlingah hlankai a ni a, hemi kum atang hian All India Football Federation hnuaia inziah luh chu a thain an hre ta a, 1986 khan AIFF Junior Championship-ah Mizoram team chu a enchhinna turin an tira, 1987-ah MFA chu AIFF affiliated member a lo ni ta a.
AIFF hnuaia inziahluh hnu hian MFA chu India ram hmun hrang hrang football inelnaah a feh chhuak ve thei tan ta a, a vawikhatna atan India rama football inelna sang ber, Santosh Trophy-ah 1987 khan team kan tirve ta hial a. State thenawma inelna lian tham vak lovah a khattawkin hlawhtlinna kan nei veta deuh reng a, 1989 khan India ram pum huap National Junior Football Championship-ah Mizoram team chuan semi final an thleng a, Mizoram footÂball chanchin ziaknaah chuan thil chhinchhiahtlak tak a ni. 1991 -ah Thimphu khawpuia Bhutan King Jigme Dorji Wangchuk Gold Cup Football-ah Mizoram Police an champion a, hei hi India ram pawna Mizoram team champion hmasak ber a ni a, champion team lo hawte hi AR Lammualah mipuiin ropui takin an lo hmuak nghe nghe a ni.
1980's tawp lam leh 1990's tir lamah hian Mizoram chhung, a bikin Aizawl khawpuiah inkhel hmuhnawm tak tak en tur a awm reng a, AR Lammualah mipui an khat tlat reng a ni ber mai a. Mizo mipuiin football an hlutin an ngaisang a, football star-te pawh an langsar tan a, AR Lammual inkhel entum ticket leitute Vanapa Hall thleng thlengin an intlar thin!
Rawltharte an inlar tan Mizoram chu India ram football inelnaah a feh chhuak ve ta reng a, National Under 16 Football Championship-ah team kan tir chhuak a, champion em lo mahse result tha tak tak an hawn reng a. Sports Department pawhin kum tinin Mizorama sikul naupang thiam bik thlan khawmte chu Subroto Mukherjee Cup khel turin a tir chhuak ve reng bawk a, India ram naupang zingah Mizo naupangte chuan result sang tak tak an hauh thei zel a, champion nomawi erawh kan la dawng lo.
1998 khan Subroto Mukherjee Cup Under 14 team chuan final an thleng a, he Mizoram team-a an striker leh top scorer, South Vanlaiphai atanga Chhinga Veng, Aizawla pem, S.Malsawmtluanga chu India rama football zirna tha ber, Tata Football Academy chuan an hnuaia football zir turin an thlang a. Hemi hnu lawk hian Malsawma, Bawngkawn; Vanlalrova, Kolasib leh Jerry Zirsanga, Khawlailungte chu TFA zawm tur hian thlan an ni ve leh ta a. Heng rawlthar rualte hi Mizorama football than chhohna kawng sialtu pawimawh tak an ni chho ta a, an inkhel chanchin chanchinbu lama lo chhuak thinte chuan Mizo naupangte a fuihin tih tak taka football khelh duhna an rilruah a tuh chho tan ta a.
Football zirna sikul-a lut an pung zel a, chutih rual chuan 2001 Subroto Mukherjee Cup Under 17 football Championship-ah Mizoram chu a vawikhatna atan an champion a, Zoramah football boruak a tleh tan ta. 2002-ah Phai lama Mizo naupang awmte'n chanchin tha chitin reng an thlen a, Malsawmtluanga'n India ram club tha ber East Bengal a zawm a, Salt Lake Stadium-a Mohun Bagan an hnehna goal a khung tih thawmte chuan Mizo mipuite a tiphur thar a, "Mizote tan football-ah hian eizawnna a awm a, tih tak taka kan khelh chuan India ramah pawh a langsar pawl kan ni thei ang," tih chu Mizote rilru put hmang a ni ta.
2002-ah Asian Under 17 Football Championship-ah India aiawh turin Jerry Zirsanga, Vanlalrova, Malsawma leh Lunglei rawlthar Lalmuankima te thlan an ni a, anni ho hian India team chu ropui takin an chetpui a, Malsawma leh Jerry Zirsanga phei chu Asian All Star team an thlan zingah an tel ve hial a. National level mai ni lo, Asian level-ah pawh kan naute chanchin tha thlen hian Mizo naupangte leh mipuite thinlungah football a tinung zel a, Subroto Mukherjee Cup under 14-ah Mizo naupangte an champion kum a lo ni leh zel a, hmasawn tumnain footballer-te rilru a hneh tan ta.
2003 - Mizo Football Golden Year
Kum 2003 a lo ni a, he kum zet hi chu Mizo football ngainatute chuan an theihnghilh tawh ngai lo ang. Mizoramin football khawvela a tawnsan ber kum a ni a, Mizoramah football boruak a alhin a alh a ni ber mai. Aizawl khawpuiah Central YMA-in football inelna lian tham tak a buatsaih a, chumi hnu lawkah National Under 16 Football Championship, North East Zone Qualifying Round chu AR Lammualah nghah a ni.
TFA lama Mizo player-te'n chanchin duhawm an thlen zel bawk a, Ireland-ah khawvel rawitharte inelna lian ber pawl, Milk Cup-ah India Under 18 aiawhin Jerry, Rova leh Malsawma te an kal a, an khel tha em em a; amaherawhchu an thleng sang lutuk lo. Ireland atang hian 2003 July thlaah Wales ram an pan a, chutah chuan Ian Rush Inter National Youth TournaÂment an khel a, India chu champion team an ni ta. Europe-a India an champion vawikhatna a ni a, champion team-a an player pawimawhte chu Mizo rawlthar pathumte an ni a, Malsawma chu top scorer a ni nghe nghe. He thawm ngaihnawm tak hian Mizoram a fan a, footballer lo hawte hmuahna inkhawm ropui tak buatsaih a ni a, Mizo mipuiin football an hlut tawlh tawlh mai.
August-ah kawrsen
August thlaah National Under 16 Football Championship chu AR Lammualah nghah a ni a, he football intihsiakna hi Mizo mipuite'n an hlut em em a, tum danga an la tih ngai loh angin Mizoram team kawr rawng, kawr sen hain Lammualah mipui an khat tlat a ni ber. Mizoram team-in final an thleng a, final-a Meghalaya nen an inkhelh tuma mipui pungkhawm chu, Mizorama tum khata mipui punkhawm tam ber pawl a ni ngei ang. Mizoram chu chamÂpion team a ni a, Mizoram lamah hian goal khat mah a lut lo va, he Mizoram team a tang hian India aiawha khel turin player thahnem tak thlan an ni.
Kum tawp lamah Subroto Mukherjee Cup khelin Mizoram chuan Under 17 leh Under 14 team a tir chhuak a, he Mizoram team pahnih hi an champion leh ta ve ve bawk a, football boruakin Zoram a chiah hneh hle.
2004 leh 2005-ah National Under 16 Football Championship-ah Mizoram chu an chamÂpion leh a, Mizote hi India ram football-ah a ber ni thei turin talent kan nei tha tawk tih chu kan naute result-in a nemnghet zel a, tunah phei chuan Mizo player-te India ram club tha ber berah an khel pha tawh a, India ram champion club-a team captain-te hial kan ni phak ta.
Mizoram chu 'football thiam state' tiin min hre tan tawh a. All India Football Federation Honorary Secretary meuh pawhin football-a Mizoram than chakzia chu India ram football hruaitute kalkhawmnaah a sawi chhuak tawh bawk.
Hetiang taka football-a hma kan sawn theihna kawngah hian media lam an thawk hlawk hle a, TV leh Radio kal tlanga international media hrang hrangte thu kan dawn piah lamah, local chanchinbu leh TV-te hnathawh hi a fakawm takzet a ni.
1954-a Aijal Sports Association dintute kha chuan tuna kan dinhmun tawn mek hi an thlir lawk thiam kher lo ang a, hruaitu hluite kha la dam kim se, lawm avangin kut an beng ve ngei ang. Mahse, tunlai thangtharte hi an dinhmun tawn mekah kan lung a la awi kim lo va, player tlem te-te hlawhtlina hi hnam pum hlawhtlinna a la tling lo a, hei aia sang hi kan thleng thei tih hriaiin, India ram football-a Mizote rorel hun thlirin hun an hmang mek a ni.
