Kum 2017 atang khan India sorkar chuan ram chhunga employment leh unemployment dinhmun chiang tak, thla 3 dan zel (quarterly)-a hriat zung zung a nih theih nan ‘Periodic Labour Force Survey’ (PLFS) leh ‘Time Use Survey’ (TUS) sample survey pawimawh tak chu a kalpui tan tawh a. He survey hna kengkawhtu ber National Sample Survey Office (NSSO) hi Mizoramah a la awm loh avangin NSSO Regional Office, Agartala chu Mizoram chhunga survey hna thawk leh enkawl zui tura ruat an ni a. He survey hna hi Mizoramah pawh kum hnih kal ta atang khan Economics & Statistics Department nena tang hovin bultan a lo ni ve tawh a ni.

National Sample Survey Office (NSSO) hi Ministry of Statistics & Programme Implementation hnuaiah kum 1950 khan Prof.P.C.Mahalanobis, Statistical Adviser to the Cabinet ruahmannaa din a ni a. Kum 1951 atangin All-India level-ah sample survey bultanin vawiin thleng hian All-India level-in kum tin sample survey chi hrang hrang - Socio-Economic Survey te, Annual Survey Industry, Price Index Survey leh Agriculture Survey te neih thin a ni. Heng regular taka kum tin sample survey neih bakah hian India ram leh United nations mamawh ang zelin ‘Miscellaneous Survey’ pawh neih thin a ni a; heng survey-te atanga ‘data’ tihchhuahte hi sorkarin Planning atan a hmang tangkai thin bakah Inflation tehna leh GDP chhutna atan te hman a ni thin a. UNO leh International Monetary Fund (IMF) ten ram hrang hrang dinhmun chhutna atana hman a ni a. Mithiam research scholar-ten thil hrang hrang an zirchianna atan an hmang mek bawk a ni.

Mizoramah hian NSSO hi a awm ve loh avangin Socio Economic Survey leh price Statistics te hi Mizoram sorkar hnuaia Economic & Statistics Department-in an thawk a, heng bakah hian All-India survey atan hian Mizoram hi telh a ni ngai lo. Kum 2017 April thla atanga NSSO Regional Office, Agartala chu Mizoram chhunga sample survey hnathawh enkawl tura thuneihna pek a nih atangin ‘Miscellaneous Survey’ chi hrang hrangte chu Agartala, Tripura atanga rawn enkawl thin a ni ta a ni.

Tunah hian Mizoram chhungah Survey pali (4) - Periodic Labour Force Survey (PLFS), Time Use Survey (TUS), Consumer Price Index (Rural) leh Market Survey te Agartala Regional Office atangin rawn enkawl mek a ni a, survey dang pawh tan leh thuai tura hmalak mek a ni bawk. Periodic Labour Force Survey (PLFS) hian employment leh unemployment data quarterly-a tihchhuah bakah ‘Worker Population Ratio’ leh ‘Labour Force Participation Rate’ chhutchhuahna tura ruahman a ni a. Time Use Survey (TUS) hi India khua leh tuite hlawh neih emaw a thlawn emawa chhawr an nih dan (paid & unpaid activities) tehna bakah zirna (education), khawtlanga  inhmanna (social activities), mahni invawng dan (self-care activities) leh intihhlimna lam (leisure activities)-a chhungkaw member tinte an inhman dan tehna tura ruahman thung a ni.
PLFS hi kum 2017 atangin bultan a ni a, Phase-I chu 31st March, 2019 hian a zo ang a; kumin vek April thla atangin Phase-II a chhunzawm tum a ni. TUS hi January, 2019 atanga bultan tura ruahman ni mahse Mizoramah chuan harsatna hrang hrang avangin March, 2019 atangin bultan theih chauh a ni a. Heng Survey hna pawimawh takte hi tha tak leh chak zawka kalpui a nih theih nan leh hmalak tawhna atanga harsatna awmte sutkian a nih theih dan tur sawihona bakah mipuiten heng survey chungchang an hriatchian theih nan ‘Regional Training Conference’ neih thin a ni a. Agartala Regional Office lama thawkte indaihlohna avangin Mizoramah hian neih a la ni ngai lova, tunah hian All-India level-ah Review Meeting nei vek tura tih a nih rual hian Mizoramah pawh neih ve nise tiin ruahman a ni ta a ni.

Tun tumah hian Agartala atangin Dr.Bandana Sen, Deputy Director General hovin Economics & Statistics Department Conference Hall-ah vawiin March ni 6, 2019 atang hian survey hna kal mek thlirhona leh harsatnate sawiho turin ‘Review Meeting’ neih tan a ni a. Periodic Labour Force Survey (PLFS) leh Time Use Survey (TUS) hna hi Mizoramah Field Officer 2 leh Field Investigator 14 ten an thawk mek a; sample survey sytem hmangin Mizoramah khaw 74 zel thla 3 dan atan thlangchhuakin hmalak mek a ni.