Vawiin  August 15, 2009 tlai dar 3 khan Chief Secretary, Pu Vanhela Pachuau-in a chennaah  emergency Press Conference  kovin, chanchinbu mi thahnem tawk tak an kal. He hunah chian Chief Secretary chuan, “Hmannia Lengpui Airport-a an endik zinga rinhlelh mi palite chu Kolkatta-ah test an ni a, an zinga pahnih, CRPF mi chhuti-a lo haw Falkawn mi leh Lengpui Airport-a CRPF duty te chu an lo positive avangin tunah hian Falkawn Referral Hospital chhawng chung berah dah an ni. Anni pahnih hi an na nasa lova, mahse fimkhur thilah ICU-a enkawl anga buaipui mek an ni.

 

 

   
India ramah Swine Flu natna a darh mek avangin Lengpui Airport-a checking hi tih tan a ni a; Nogpa-ah pawh hetiang checking hi ti tura tihfel tawh a ni a, Khawkawn, Manipur ramria sawn a tul chuan Champhai Bawrhsapin a buaipui ang. Champhai Zokhawtharah pawh naktuk, August 16,2009 hian checking nei tan turin Champhai D.C-in hma a la mek a; Vairengte leh Bairabi-ah pawh a tul chuan hmalak zel a ni ang,” Pu Vanhela, Chief Secretary chuan a ti. Pu Vanhela Pachuau chuan hemi lama inzirtirna hi AIR, Doordarshan leh Local Cable TV ten a tam thei ang ber rang takin buatsaih turin a ngen nghal bawk a ni.
    
He thu hi sawi chhunzawmin  Pu Vanhela chuan, tunah hetiang mi pahnih hmuh chhuah an nih avang hian mipui chiai a tul lova, lo buai a ngai lo. Sorkarin theih tawpin tan a la ang a, thunun theih ngei tumin tan lak zel a ni. Amah lo tawiawmtu Dr. N. Palai, Director of Health Services chuan tuna mipui nawlpui tan Mask hman hi a tulin kan hre lova, khawsik hritlang, mahni inringhlelte chuan mask hi hman a tha. Anmahni puitu Doctor ten Press mite zawhna chhangin, a natna hriat hma ni 7 vel leh an dam hnu ni 14 thleng chu mi dang kai chhawn theih lai a nih avangin fimkhur a ngai em em. Boruaka inkaichhawn mai chi erawh a ni lova; hemi vei damlo hma zawn metre khat vela thute tan kai a sam a, fimkhur a tul a ni. Tunah hian a damdawi capsule 2000 vel kan nei a, hlauhthawn tur a ni love,” an ti a ni.
    
Tunah hian mahnia inrinhlelhna neiten Casualty-a in-report mai tur a ni lova; Civil Hospital-a Room No. 207 chu hetiang tihna atana buatsaih mek a nih thu an sawi bawk.