3812/2022-2023

Aizawl, the 10th March, 2023: Vawiin khan '3rd Session of National Platform for Disaster Risk Reduction' (NPDRR-2023) chu Vigyan Bhawan, New Delhi ah Prime Minister Pu Narendra Modi in a hawng a; he hunah hian Pu Amit Shah, Union Home Minister for Home Affairs & Cooperation leh Pu Nityanand Rai, Union MoS for Home Affairs te pawh an tel a ni.

NPDRR-2023 hawnna inkhawmah hian India rama mahni hnathawhnaa inpe, huaisen leh hnathawktha lawmman 'Subhash Chandra Bose Appda Prabhandan Puraskar Awards 2023' semna hun hman nghal a ni a. He lawmman dawngtute zingah Lunglei Fire Station, Mizoram pawh a tel avangin Pu C.Lalzahngoa, Director, Fire & Emergency Services leh Pu Francis Lalnuntluanga Ralte, SP, Fire & Emergency Services te chuan Prime Minister of India hnen atangin an dawng a ni. He lawmman hian certificate leh pawisafai cheng nuai 51 a keng tel bawk a. Lawmman semnaah hian kum 2021-a Lunglei ram kang chungchang video tawi tihlan a ni a, video siam tur hian February 2023-ah Delhi atangin officials te Mizoramah lo kalin a hmun ngei an tlawh a ni.

He lawmman 'Subhash Chandra Bose Appda Prabhandan Puraskar Awards 2023' dawng thei turin nomination 274 lut atangin Odissa Disaster Management Authority leh Lunglei Fire Station te thlanchhuah an ni a. Vawiina lawmman semna inkhawmah Fire & Emergency Services officials te bakah Pu Zosangliana Hualngo, Commandant General cum Director, Mizoram Homeguards leh Pu Lalrinawma Traite, Dy. Secretary, Disaster Management & Rehabilitation te pawh an tel a ni.