No.7342/2020-2021

India ram Danpui hman tanna ni, Republic Day chu India ram hmundangte rualin Mizoram hmun hrang hrangah te CoVID-19 Hrileng karah Sawrkarin Inkaihhruaina a siam te tha taka zawmin lawm a ni a. Mizoram chhunga 72nd Republic Day lawman programme lian ber chu tukin zing dar 8 khan Sipai Lammualah neih a ni. He hunah hian Governor P.S. Sreedharan Pillai chuan Parade contingent ruat bik ten  Hnam Puanzar zahna chibai an buk chu a chhanglet a. Hemi hnu hian  Republic Day puala thuchah a sawi chhunzawm nghal a ni. 

Republic Day vawi 72-na puala thuchah sawitu Governor P.S. Sreedharan Pillai chuan Zoram mipuite duhsakna chibai a buk hmasa a. CoVID-19 hrileng karah pawh he hun pawimawh tak hi India khua leh tui te chuan an awmna hmunah theuh Hnam Puanzar pawtparhin inpumkhatna lan tirin an hmang a ni a ti. India ram leh India mipuite hmalam pana kan pen mek lai hian keini leh kan fate chauh ni lo mitin tana hmalam hun muanawm leh phurawm tak a lo thlen theih nan ram hrang hranga chengte nena pheikhai rual taka kal hi kan duhdan a ni a ti a. Ram chhung kiltin hmasawnna turin sawrkar chuan hna a thawk a. COVID-19 hripui leng kan hma chhawn meka, he hunah hian India ram tanrualna hi khawvel hmung dangte tan pawha zir tham, keini tan mahni intodelh tulzia min zirtirtu a ni tih a sawi a. He hunah hian ‘Atmanirbhar Bharat – India, Ram intodelh’ tih pawimawhna pawh kan hrechiang thar leh a ni a ti. 

Chutiang bawkin Mizoram State Sawrkar hmalakna leh tha thlah lova thlawp tlattu kohhran leh tlawmngai pawl te, mipui mimir leh ral hmatawnga bei tura penchhuakte inpekna avangin kan state chhungah hripui leng a ziawm hle a. Ram chhung hmun dangte nena khaikhinin coronavirus avanga damlo an tlem a, he natna avanga thi tlem berna state kan ni a. Hripui vanga hun harsa leh khirh kan hmachhawn dan hi a chhuanawm a, Mizoram sawrkar leh mipui te thawhhona chu a lawmawmin a chhuanawm takzet a ni a ti. Republic Day vawi 72-na lawmna pual hian Governor P.S. Sreedharan Pillai chuan State hmalakna hlawhtling tlak tak zinga langsarzual te a sawi a. Dan leh thupek kenkawhna chungchangah Mizoram chu a hlawhtling chhunzawm zel a; state chhung pawh a ralmuang a. Mizoram leh Assam Ramri buaina pawh a punlun hmain boruak tha tak hnuaiah inbiakna neiin hmalak zel dan tur pawh rel a ni a. Hetih lai hian Mizoram ramri te chu uluk taka ven chhunzawm zel a ni a ti. 

CoVID -19 hrileng dona kawngah Health & Family Welfare Department in hna tha taka a thawh thu a sawi a. Home Department leh Disaster Management & Rehabilitation Department te nen an thawhhona a that avangin Hripui leng avanga harsatna liantham awm theih te pumpelh a ni a ti a. CoVID-19 dona kawnga hmalakna piah lamah mipuite hriselna tura sawrkar hmalakna dangte pawh that akin kalpui a ni a. Mizoram State Health Care Scheme hnuaiah chhungkaw 50,000 ziah luh an ni a. Ayushman Bharat- Pradhan Mantri Jan Arogya Yojana hnuaia chhungkaw nuai 2 deuh thawh ziahluh an ni a. Mizoram State Cancer Institute chhungah Khum 50 awmna Tertiary Care Centre pawh sak mek a nih bakah Ministry of Health & Family Welfare atanga sum lo kal atangin Sawrkar Civil Hospital-ah te Trauma Centre te pawh siam a ni bawk a ni a ti. 

Hripui leng karah pawh Zirlaite zirna a khaihlak loh nan School Education leh Higher & Technical Education te hmalaknain Online Class te hlawhtling taka kalpui a ni tih a sawi a. Central Sawrkar hmalakna “Padhna Likha Abhiyan’ kaltlangin ziak leh chhiar thiam tlemna hmun deuh bikah mi 30, 000 te zirtirna pek a ni a. Zirna huangah hrim hrim hian Mizoram sawrkar chuan hma a la tha hle a, Class hniam lam lama Mid-Day Meal( Chawchhun) pek thin atana State senso tur Central sawrkarin a tuk aia tam zawk Mizoram sawrkar chuan a tum thei hial a; a lawmawm hle a ni a ti. Hmeichhia te leh Naupang te enkawlna leh an hriselna enkawl kawngah pawh ‘Poshan Abhiyan’ hnuaiah hmalakna tam tak kalpui mek a ni a. Hetih lai hian ‘Pradhan MantriMatru Vandana Yojana’ hmalakna huangah pawh Mizoram chu India ram pum a thawk tha ber 4-na niin India Hmarchhak State zingah phei chuan Pakhatna hial niin a thawk tha hle a ni a ti. 

Hmasawnna ruhrel tha zawk siamin Mizoram sawrkar chuan chawl loin hna a thawk chhunzawm zel tih a sawi a. Public Works Department hnuaia kawng siam leh Lei dawh bakah a enkawlna te chu State in a thil ngaih pawimawh a la ni chhunzawm zel a. Central Sawrkar, World Bank, Asian Development Bank leh NABARD atanga sum lo kal te leh SEDP hnuaia sum ruahman atang tein District chhunga inkalpawhna kawngpui 82 lai siamthat mek a ni a. Lengpui Airport chei that bakah Aizawl khawpui tawt lutuk tih ziaawm nana Kawngchhawng siam tur tein ruahmanna a kal mek bawk a ni a ti.Jal Jeevan Mission kaltlangin Public Health Engineering Department chuan Thingtlanga chenna in 40, 000-ah tuithianghlim lakluhna a siam sak tawh a. Kawlphetha intodelh tura hmalakna pakhat, Tlungvel Solar Power Plant chu Rs 1400 Lakhs sengin siamzawh a hman tan a ni tawh a ni a ti.

Agriculture & Allied Sector a hmalakna hrang hrangte leh hlawhtlinna te pawh a tarlang a. SEDP hnuaia hmalakna pawimawh tak pakhat chu Vawkvulh leh Arvulh a ni a. He hmalaknaah hian SEDP Pilot project siamin District 8-ah Beneficiary 1020 chu a hma hruaiah tanpui an ni dawn tih a sawi a. Hrileng vanga harsatna tawktu Sanghavulhtute pawh theihpatawpa tanpui niin Sangha chi tlawm zawk a leitir an ni a. Pradhan Mantri Matsya Sampada Yojana hnuaiah Sangha chi siamna hmun remchang 4-ah siam a ni dawn a. Horticulture huang chhungah pawh SEDP kalpui niin Model Bamboo Plantationpawh kalpui mek a ni a ti. Horticulture hnuaia hmalakna tho - Post Harvest Development programme pawh chak takin kalpui mek a ni a. Chutiang bawkin Central Sawrkar atanga tanpuina lo kalte leh SEDP hnuaia ruahmanna te hmang tangkaiin AgricultureDepartment hnuaiah pawh hmalakna tam tak neih mek a ni a ti. Prime Minister’s Employment Generation Programme hnuaiah mahni kutkea din tum, sumdawnna huanga bultantu 269 hnenah tanpuina sum, Margin money Rs.356 Lakh pek a ni tawh a. Handloom & Handicrafts Wing chuan Ministry of Textiles tanpuinain Cluster Development Project 17 lai hlawhtling takin a din tawh bawk a. NABARD RIDF Scheme hnuaiah Soil & Water Conservation Department chuan Rubber Plantation siamin Rubber Roller Machines 100 lai District hrang hranga Rubber Huan neitute hnenah a pe chhuak tawh bawk a ni. 

Rural Development Department kaltlangin thingtlanga chengte dinhmun chawikan hna chak takin thawh mek zel a ni a.Tunah hian chungkaw nuai 2 chuang te tan MGNREGA hnuaiah ni 96 inhlawhna buatsaih tawh a ni tih a sawi a. Hmeichhe loneitu 5000 te chu ‘Mahila Kisan Shashaktikaran Pariyojana’ scheme hmanga chhawmdawl an ni tawh bawk a ni a ti. Shyama Prasad Mukherji Rurban Mission hnuaiah hmalakna tha taka kalpui mek a nih thu sawiin Pradhan Mantri Krishi Sinchayee Yojana hnuai ruahtui khawlna siam a nih thu te leh ram leilung te pawh buh leh thali chin nan cheibawl that a nih thu te a tarlang bawk a ni. Governor chuan khawpui lian deuh chhunga sawrkar hmalakna te leh hnathawh langsar zual te pawh a tarlang a. Mizoram chhunga Notified Town 23 chu a hmun pangai loa Zun leh Ek thiar awmlohna hmun, Open Defecation Free a ni tawh ni a ti a. ‘Swachh Survekshan’ ina tehnaah Mizoram chu state thianghlim thlanchhuah zinga 13-na a ni mek a. ‘PMSVA Nidhi Scheme’ hnuaiah Dawrte neitu 681 chu tanpui an ni tawh bawk a ni tih a sawi a. AMRUT kan hman that avanga lawman sumfai tam tak kan dawn thu te a sawi a. AMC hmalakna hnuaiah hlawhtling takin Local Level Task Forces on COVID-19 pawh din a ni a ti.

Infiamna huangah nasa takin hma kan sawn; Khualzinmite hip tura sawrkar hmalakna te pawh a hlawhtling chho mek bawk a lawmawm hle a ni a ti. Mizoram chu India ram state zingah Industry atan Sports pawm hma ber kan ni tih a sawi a. ‘Pradhan Mantri Jan Vikas Karyakram’ hnuaia inkhelhna tur hmunhma te buatsaih mek a ni a; ‘Khelo India Scheme’ hnuaiah infiammite tih hmasawnna tura hmalakna tam tak a kal mek a. Tunah hian Mizoram chu ‘Khelo India State Centre of Excellence’ atana thlan hmasak state 8 zingah kan tel a, a lawmawm takzet a ni a ti. Hrileng karah Khualzinmite hip tura sawrkar hmalakna te a chawllo tih a sawi a. Swadesh Darshan Scheme of the Government of India hnuai siam Thenzawl Golf Resort pawh hawn a ni a. ‘Anthurium Festival’ leh ‘Winter Festival’ tihdan chi dang, Virtual hmanga hman a nih thu te leh NESIDS Scheme hnuaiah Ministry of DoNER chuan Rs.560 lakhs pawh Reiek leh a chhehvela Khualzinmite hipna tur buatsaih nan a rawn pek fel tawh thu a sawi bawk a ni. 

Governor chuan  Republic Day ah hian he ni pawimawhna hre thar leh turin mipuite a chah a. India ram chu tu thuhnuaiah mah kun lova mahnia inrelbawl thei mipui sawrkar, harsatna tam tak paltlang hnua Ram Danpui kan neih tak avanga he ni hi ropui taka lawm kan ni  tih a sawi a. “August ni 15, 1947 ah India ram chuan zalenna sual chhuak tawh mah se, ram Danpui - Constitution nei thei tur hian kum hnih leh a chanve lai a la duh a ni. India ram zalenna sual chhuaktu pasalthate inpekna nasa tak avangin mahnia ro in rel thei sawrkar a lo ding a. He ram a lo pian theihna tura hnam pasaltha te inhlanna kha kan theihnghilh ngai lova. An inpekna leh channa nasatzia hre rengin keini pawhin harsatna tinreng paltlanga an sual chhuah, mipui sawrkar inrelbawlna dik, zalenna,dikna, intluktlanna leh inunauna te hi kan vawng nung reng tur a ni a. He ram ropuitaka cheng ten hlim taka kan hman mek Republic Day-a lawmna leh hlawhtlinna thinlung kan put hi ral mai lovin ram hmasawnna tura inpekna thar nen kawng dik zawh tur leh hmasawnna rahbi thar chuangkai zel turin i inbuatsaih ang u”, a ti a ni.

COVID-19 hrileng hi a reh mai dawnin a lang lo tih sawiin Mizoram mipuite fimkhur chhunzawm zel turin a chah a. “Kan himna tura sawrkarin inkaihhruaina a siam te tha taka kan zawm avangin Mizoram chu COVID-19 avanga tuar nep ber State kan ni thei a ni. He hunah hian COVID-19 dona kawnga State Sawrkar, kohhran, tlawmngai pawl leh vantlang mipuite thawhhona leh inpekna ka chawimawi nawn leh a ni”, a ti. 

Kumin Republic Day Ceremonial Parade-ah hian Contingent 6 ruat an ni a. Chungte chu - 1. 46th Assam Rifle, 

2. 90th Bn BSF,  3. 3rd Bn MAP, 4. 5th IR Bn,  5.MRHG  leh 6. 1st Bn MAP Brass Band te an ni a;  Lam (March-Past)  awm lo a, Guard of Honour chiah pek  a ni a. Parade Commander : Lalhmangaihhlua, DySP (CID-SB) leh 2nd commander : Lalrinpuia Chenkual, SDPO, Aizawl South ten Republic Day Ceremonial Parade  Contingent te hi an kaihruai a ni.

Kumin Republic Day Lawmna inkhawm, Lammuala neihah hian Governor P.S. Sreedharan Pillai chuan Social Works(Vantlang rawngbawlna) kawnga hna thawh that avangin Pi B. Sangkhumi chu Padma Shree dawng tur zingah a tel tih a sawi a. Lawmpuina leh duhsakna a hlan nghal bawk a ni. Kum dang ang bawkin kumin hian Mizoram Police & Fire Services  hnathawk tha te zingah  President’s Police Medal for Distinguish Services, President’s Fire Service Medal for Distinguished Service, Police Medal for meritorious service, Fire Service Medal for Distinguished Service leh Governor’s Medal te dawng an awm leh a. Heng mi te hian Governor P.S.Sreedharan Pillai hnena tangin lawman an dawng a. UD&PA buatsaih Mizorama Khawpui Fai Intihsiak 2020 lawmman pawh Governor hian a sem nghal bawk a ni. 

Heng mite hian kumin Republic Day Lawmna inkhawm, Lammuala neihah Governor P.S. Sreedharan Pillai hnen atangin President’s Police Medal for Distinguish Services, President’s Fire Service Medal for Distinguished Service, Police Medal for meritorious service, Fire Service Medal for Distinguished Service leh Governor’s Medal te an dawng a ni.

 1) PRESIDENT'S POLICE MEDAL FOR DISTINGUISHED SERVICE

- Pu C. Lalthanmawia, MPS, Director, Fire & Emergency Services

2) President’s Fire Service Medal for Distinguished Service

-Pu Lalremtluanga Varte, Station Officer

3) POLICE MEDAL FOR MERITORIOUS SERVICE

- Pu  C. Lalruaia, MPS, SP Aizawl 

- Pu Lalthakima, Inspector (Armed Branch), Police Training School

4) Fire Service Medal for Meritorious Service

- Pu Hmingthanzama Kawlni, Fireman

Governor’s medals:-

 1) Governor’s Gold Medal : Inspector Joseph Zairemmawia, MPRO

2) Governor’s Gold Medal : Havildar Daniel Ramhluna, Police Training School

3) Governor’s Silver Medal : F. Lalmuanpuia, Police Hqrs.

4) Governor’s Silver Medal :Head Constable C. Chawngkunga Traffic Unit

5) Governor’s Silver Medal : Constable R. Lalnunthara, Aizawl DEF 

Heng mi te hian kuminah President’s Police Medal for Distinguish Services, Fire Service Medal for meritorious Service leh Police Medal for meritorious service dawng tura puan an ni a; nakkum Republic Day-ah Governor hnen atangin lawman an dawng dawn a ni.

1. President’s Police Medal for Distinguished Service

-  Pu VL Hmangaihzuala, Deputy SP (Legal), Police Headquarters

2. Police Medal for meritorious service

- Pu F.Lalhmingliana, Assistant Commandant, 3rd IR Battalion

- Pu Zarzokima, Inspector of Police, Aizawl DEF

- Pu F.Vanlalkima, Inspector of Police, Mizoram Police Central Armoury, Police Headquarters

3. Fire Service Medal for Meritorious Service

-  Pu  Vanlalruala, Leading Fireman, Kolasib fire Station 

He hunah hian Urban Development & Poverty Alleviation Department buatsaih Mizoram Khawpui Fai Intihsiakna 2020 result puan a ni. Intihsiaknaa tithe te lawman hi   Mizoram Governor PS. Shreedharan Pillai-in a sem a ni.  

Mizoram khawpui 23-te he intihsiakna ah hian telin endik tura ruat Panel of Experts ten Mizoram khawpui 23 te hi fangchhuakin endikna tehfung hrang hrang hmangin an endik vek a ni.  

Mizoram Khawpui Fai Intihsiakna 2020 result leh lawmman pek dan chu hetiang hi a ni:- 

CATEGORY-I (District Headquarters) 

1. Lunglei- Pawisa fai Rs. 1,00,000/- leh Certificate 

2. Saitual- Pawisa fai Rs. 80,000/- leh Certificate 

3. Khawzawl- Pawisa fai Rs. 40,000/- leh Certificate 

CATEGORY-II (Other Urban Towns) 

1. Biate- Pawisa fai Rs. 1,00,000/- leh Certificate 

2. Lengpui- Pawisa fai Rs. 80,000/- leh Certificate 

3. North Vanlaiphai- Pawisa fai Rs. 40,000/- leh Certificate 

Mizoram Khawpui Fai Ber 2020 (Overall Cleanest Town) atan Lunglei Khawpui thlan a ni a, hei hian Pawisa fai Rs. 1,00,000/- leh Certificate a keng tel bawk a ni.  

Hei bakah hian kum danga la awm ngailo kum 2020 Khawpui Fai Intihsiakna ah hian dah tel a ni a. Nodal Officer viak tha, khawtlang huikhawm thiam leh kaihruai tha ‘Best Nodal Officer’ bakah khawtlang hruaitu tha, Faina leh thianghlimna kawnga hnathawk tha leh Faina Hapta 2020 puala hma la tha pathum (3) thlanchhuah niin, lawmman pakhatna atanga pathumna thleng siam a ni.   

Heng lawmman la tute chu:- BEST VILLAGE COUNCILS 

1. Lengpui VC- Pawisa fai Rs. 30,000/- leh Certificate 

2. Tlabung VC- Pawisa fai Rs. 20,000/- leh Certificate 

3. Bairabi Joint VC- Pawisa fai Rs. 10,000/- leh Certificate 

BEST NODAL OFFICER: Pi Dorothy Muansangi, SDO (C), North Vanlaiphai- Pawisa fai Rs. 10,000/- leh Certificate.