MJA leh Directorate Information & Public Relations Officer-te chuan vawiin chhun khan I & PR Conference Hall-ah kumthar thingpui inhona neiin an thawhho chungchangah inkawmna hun thawl tak an hmang.
 
 

Inkawm hona thuhma neiin Director, I & PR Pu Jim K. Chozah chuan MJA leh I & PR te chu inngheng hnai tak thawk ho intawiawm thin an ni tiin an thawhhona ah hian in mamawh tawn reng an nih avangin he thawhhona tha tak hi chhawmnun reng a tul thu a tarlang a. Journalists Welfare Fund duanchhuah kawngah pawh an thawhhona avanga hlawhtling ta a ni a ti a. He Journalists Welfare Fund hi siam that mek niin hun reilote chhungin zau zawka hman tangkai theih beisei a ni a ti a. Siam tharah chuan Journalists ten rikrum leh hriatlawk loh thil chhiatna hrang hrang an tawh thulhah te, an hna an thawh laia chetsualna hrang hrang an tawh palhah te leh natna khirh bik inenkawlna chungchangah te chhawmdawlna ruahman a nih thu a tarlang a ni.

MJA President Pu K. Sapdanga pawhin hetianga kumthar thingpui inhona hlimawm tak buatsaih anih chungchangah lawmthu sawiin chanchinbu te hi an lian emaw an te emaw mi tu te emaw tana eizawnna siam thei an nih avangin chanchinbu tam lutuk anga ngaihdan awm thei chu thil dik ber nia a rin loh thu a sawichhuak a. Chanchinbu hrang hrang awm hi mipui leh sorkar tan a chhenfakawm zawk a ni tiin chanchinbu tlemte lian zawk neih rawtna awm thinte chu ngaihdan mai a nih thu a sawilang. Chanchinbumite innghahna ber pakhat advertisement chungchang pawh sawilangin department hrang hrangte hian sorkar laipui kalphung anga Information Education Communication hawia chanchinbumite tan thu puanzar kawng ruahman nise a duh thu a sawi a ni.

Vawiin inkawm hona ah hian rawtna hrang hrang sawichhuah niin a bawhzui dan turte pawh ngaihtuah tlan zel nise tia inpawh taka hun hman a ni.

Attachment

  • Loading attachment...