Vawiin khan I&PR Department hotute leh Mizoram Journalist Association-te’n I&PR Auditorium-ah kumthar thingpui inhona neiin inhlantharna hun an hmang.

I&PR Joint Director Pi Lalnithangi kaihhruai he programme ah hian I&PR Director Pu Jim K.Chozah chuan kalkhawmte kumthar chibai bukin kawng engkimah thawhhona tha tak neia tun hun an thleng thei chu lawmawm a ti a. Mihring nun derthawnzia ngaihtuahin fimkhur taka nun hmang tur leh innghahna tlak awmchhun chu Pathian chauh a ni tih hria a, an nitin hnathawhnaah Pathian tihna nen hnathawk turin kalkhawmte a sawm a. MJA Vice President Pu Zonunsanga Khiangte pawhin I&PR department te nen thawhhona tha tak an neih chhunzawm zel avanga lawmthu sawiin an thawhhona sawhnghet zual tur leh chanchinbumite leh mipui mimirte tana chhawr tangkai theih tur nia a hriat thil pawimawhte a sawi lang bawk a ni.

He inhlantharna programme ah hian Mizoram chhunga sorkar hmalakna a hmunhma ngei a tlawh a mipui hriat tura a zau thei ang bera puanzar te, Journalist chhuak thar te leh a awmsa te intuaithar nana media workshop neihte, press tour, journalists accreditation, welfare fund leh thil pawimawh dangte huam zau taka sawiho a ni a. MJA member boral ta Pu Laldinthara (Thartea), News Editor, LPS Vision; Pu DK Sona Hnialum, News Editor, Lawngtlai Post leh I&PR a thawklai boral ta Pu Robert Thangmawia, MIS, IPRO leh Pu Lalfinga, Peon te sunna hun hman a ni bawk.