Mizoram State Assembly Election 2018-a hman tur Lawngtlai District-a assembly constituency pathuma electoral roll chu vawiin khan Lawngtlai District Election Officer, Lawngtlai Bawrhsap Pu N. Chakhai MCS chuan DC Conference Hall-ah a tlangzarh.

Pu N. Chakhai chuan electoral roll tha tak neih theih nana hma latu zawng zawng chungah lawm thu sawiin, electoral roll thar

chu political party-te hnenah a sem nghal.

Lawngtlai District-a MLA bial pathum- Tuichawng, Lawngtlai West leh Lawngtlai East-ah te draft electoral roll aia vote nei thei punna hi 860 niin, Tuichawng-ah 498, Lawngtlai West-ah 318 leh Lawngtlai East-ah 44-in a pung a; bial pathuma a punna hi 1.07% a ni.

Heti hian Lawngtlai District-a bial pathuma voter awm zat chu mipa 39933 leh hmeichhia 40187, an vaiin 80120 an ni a. Tuichawng bialah voter 30571 awmin, Lawngtlai West-ah 26100 leh Lawngtlai East-ah 23449 an awm thung.

Assembly bial pathumah hian Lawngtlai-III Polling Station chu voter tam berna niin, voter 1242 an awm a. Voter 87 awmna Lawngtlai West huam chhunga Saikah ‘L’ Polling Station chu voter awm tlemna ber a ni.