2475/2025-2026

Champhai, dated 17th September 2025: Vawiin khan Adviser to Chief Minister (Technical) leh Champhai North bialtu MLA ni bawk, Er. H. Ginzalala chuan Skill Development & Entrepreneurship Incubation Centre, CHANEM, Champhaiah District Industries Centre huaihawt Tailoring Training pilot course thla ruk (6) awh tur khuallian niin a hawng.

Khuallian Er. H. Ginzalala chuan hun tha tak buatsaih a nih avangin lawmthu a sawi a, tailoring training course chu lawm takin a hawng a ni. Mizo khawtlangah chuan intluktlanna, hawihhawmna leh rinawmna kan thanlen pui a, kan harsatna te hian tanrualna min pe a ni tih a sawi a, heng hian thinlung tha leh fel, rilru taima min pe a ni tih a sawi. Entrepreneurship lut tur chuan entrepreneurship rilru leh thinlung neih a pawimawh a, mi tam zawk tih dan te zui kher lo a mimal leh khawtlangin enge an mamawh tih ngaihtuah thiam turin a fuih a, puanthui te paw'n thluak an hman thiam chuan anmahni hlawk zawkna tur an ngaihtuah thiam ngei a rin thu a sawi. Training-a an zir tur te tha taka ngaithla a thiamna lalut turin a sawm a, mahni thiamna leh taimakna ti lang chhuaktu atana an hman ngei a beisei thu a sawi.

He hun hi District Commerce & Industries Officer Pu Vanlalpara'n a kaihruai a, Office Assistant Pu Lalramdina'n trainer leh trainee te inhmelhriatna hun a hmang. Kalkhawmte tan thusawina hun hawn a ni a, mi hrang hrang thusawina hun an nei bawk. Trainer hi Pi Lalrinmawii niin trainee 15 thlan chhuah an ni a, reserve-ah trainee 5 an awm bawk.