2673/2023-2024

2023 Sahmulphah thla ni 5: November ni 7, 2023-a Mizoram Legislative Assembly Inthlanpui buatsaih tura Kolasib District chhunga inthlan buaipui tur polling official-te 3rd & final randomisation chu vawiin chawhnu khan Kolasib DC Video Conference Room-ah General Observer Pu Anant Lal Gyani leh District Election Officer Pu John LT Sanga te hovin buatsaih a ni.

He hunah hian Election Officer Pi Christina Lalmuanzuali leh official dangte bakah, political party ai awhte an tel a. 1st leh 2nd randomisation hmanga Kolasib District chhunga inthlan buaipui tur, Presiding Officer, 1st Polling Officer, 2nd Polling Officer leh 3rd Polling Officer thlan chhuah sa leh team inkawp tur leh an kalna tur constituency thliar fel tawhte chu final randomisation-ah hian khawl hmangin an duty-na tur polling station tihfel a ni.

Kolasib District chhunga assembly bial pathuma polling station 89 awmah inthlan buaipui turin PRO 1 leh PO 3 ṭheuh ruat an ni a. Tuirial biala polling station 26 awm zingah hmeichhe hlang duty-na tur (all women managed) polling station 3 awmin, Kolasib biala polling station 29 zinga 4 chu hmeichhe hlang duty-na tur a ni thung a, Serlui biala polling station 34 zinga 3 chu hmeichhe hlang duty-na tur a ni bawk. Polling station tina duty tur team ruat fel sa bakah, thlaveng (reserve) atan Tuirial bialah hmeichhe team 2 leh mipa team 4, Kolasib bialah hmeichhe team 2 leh mipa team 2, Serlui bialah hmeichhe team 2 leh mipa team 5 dah an ni bawk.