4096/2023-2024

Aizawl, 08.03.2024: Vawiin March ni 8 hi khawvel pumah hmeichhiate ni 'International Women's Day' a vuah a ni a. Hemi ni puala Indian Christian Women's Movement, Mizoram Unit (ICWM) te'n chawhnu dar 1:00 PM a Millenium Centre kawtzawlah hun an buatsaih chu MLA Pu Baryl Vanneihsangi chuan khuallian niin a hmanpui.

Pi Baryl Vanneihsangi chuan Hmeichhiate Ni hi a hlut zia sawiin, hmeichhia mahni inchhunga kut tuar thin te Aizawlah hian an lo tamzia te, one-stop centre indaihloh dante leh hmeichhiate humhalh tute thlengin vau an tawh dante a sawi a. Chung dinhmun a dingte tan chuan theih tawp chhuah turin ka inpeih thu a sawi. Vawiin ni thupui - Hmeichhiate telh ve la, ring ngam la, hmasawnna i hmu ang tih chu Mizoram politics atang pawhin a hmuh theih zel nia a hriat thu a sawi a. Intluktlanna 'equality' chungchangah chuan taksa pumrua leh chakna lam intlukna lam nilovin, thiamna in ang rau rau ah hmeichhia leh mipa inkarah inthliarna awm lo se tih chu pawimawh a tih thu a sawi a. Unuted Naions Sustainable Goals hnuaia thiltum zingah Gender Equality 2030 a tel thu leh, chutah chuan hmeichhia a investment neih pawimawh chung chang ziah a nih thu a sawi a. Hmeichhiate hi hmasawnna tluantling sustainable development programme ah an tel ve ngei ngei a ngai a ni a t a. Khawvel mihring zatve an nih vang te, hmeichhia te hlamchhiah an nih chuan hmasawnna tluantling hi a thleng thei ngai dawn lo a ni, rin an nih a, telh ve an nih phawt chuan khawvel pumpui hi a tha zawngin an thlak danglam dawn a ni, a ti. Pi Baryl Vanneihsangi chuan pawl hrang hranga hmeichhia te an tel ve naah a lu ber nih tir hi harsa kan la ti hle a, chhungkua ah pawh hmeichhia te kan la awp bet deuh ni in a lang a, mahni in chhunga fanu te awpbeh a an awm chuan khawtlangah mahni inrintawkna an nei thei lo ang, hei hi nu leh pa te pawhin kan fanu te chunga kan rilru put hmang kan siam danglam a ngaihna a ni, a ti a. Sawrkar chuan Gender Budgeting a rawn siam ta a, hei hian hmathlir duhawm min neih tir in, hmeichhia te tan kawng pawimawh tak a ni, a ti.

He programme hi Pi Maria Hmangaihzuali, President ICWM chuan a kaihruai a. ICWM chu India rama Kristian Hmeichhia zawng zawngte inzawm khawmna Pawl a nih avangin kohhran bil ta a nih lova, kohhran leh khawtlanga intluk tlanna leh hmeichhia te dikna chanvo humhalh leh hmeichhia te theihna haichhuah a chawilar chu an pawl tum ber a nih thu a sawi.

Hmeichhe MLA pathumte lawmpuina ICWM hmingin hlan a ni bawk.