4097/2023-2024

2024 Vau thla ni 8: Vawiin chawhnu dar 1 khan International Women's Day chu NABARD Kolasib District bul tumin “Invest in women: Accelerate progress” tih thupui hmangin VC House, Thingdawl, Kolasib District-ah hman a ni a. Thingdawl RD Block-a Block Developement Officer (BDO) Pi F. Lalnisai chuan Khuallian niin a hmanpui.

Khuallian Pi F. Lalnisai chuan kal khawmte chu International Women's Day chibai a buk a. Tun lai khawvelah hmeichhiate dinhmun inthlak chho zelin, hmeichhiate'n hma an sawn zel tih a sawi a. Hma sawn zel tura theih tawp chhuah a ṭul thu a sawi. NABARD hnuai leh MzSRLM hnuaia hmeichhiate hamṭhatna tura ruahmanna project hrang hrangte tar langin, hmeichhiate leh chhungkuain hma an sawn zel theih nan he'ng project ruahmante hi ṭangkai taka chhawr tum turin kal khawmte chu a chah bawk.

He hun hi NABARD Kolasib District Development Manager Pu JD Traite chuan a kaihruai a. International Women's Day hman a nih chhan sawi fiahin, NABARD lamin hmeichhiate hmasawnna leh changkanna tur a ngaih pawimawh thu a sawi a. SHG-Bank Linkage Programme leh Skill Development programme (MEDP, LEDP) te leh project chi hrang hrang farm sector leh non-farm sector-ah hmeichhiate hmasawnna atan scheme tam tak a awm thu leh nasa taka hma lakna an kalpui thu a sawi.

He hunah hian Thingdawl RD Block huam chhunga self help group (SHG) member-te an kal khawm a. Pi Lallianpuii, DFDO; Dr Lalsanglien Ralsun, DAH&VO; Pi Lalengmawii, LDM; Pi Lalhmangaihzuali, Branch Manager, MRB Thingdawl; Pu TC Lalthangzova, VCP Thingdawl te bakah,  Thingdawl MzSRLM-a thawktute'n SHG member hmeichhe kal khawmte tana hriat tur pawimawh leh hmeichhe dinhmun chawi san a nih zel theihna tura thil pawimawh tak tak an sawi a ni.