4216(P) Government Housing Fund atanga sum Rs 2,18,55,000 /- senga sak chu vawiin tlai dar 3:00 khan MOS Pu Lal Thanzara’n a hawng.

Hawnna inkhawm kaihruaitu Pu Lalramthanga, Principal Secretary, PWD chuan PWD (Architect Cell) ten office building thar tha tak an nei ta chu Sorkar chungah lawmthu a sawi a, sorkar hnathawk ten hun tam ber an hmanna office building tha neih chu a pawimawh thu sawiin hnathawhna hmun nuam tak an neih tak chuan an hnathawhna ah pawh chak zawk leh tha zawka thawk thei tura a puih ngei a beisei thu a tarlang a, office hun vawn dik kawngah midang te entawntlak ni tura rinawm taka thawk thin turin PWD officer leh staff kalkhawm te chu a fuih bawk.

MOS Pu Lal Thanzara chuan sum tlemte senga office building tha leh changtlung tak an sak zawh theih avanga lawmthu sawiin ram tana theihtawp chhuaha tan la chhunzawm zel turin kalkhawmte chu a chah a. PWD chu ram hmasawnna ruhrel pawimawh khawihtu an nih thu sawiin Mizoram tihhmasawnna tura kawng hrang hranga an hmalakna te a tarlang a, kawngpui siamthat nana World Bank atanga cheng vaibelchhia 600 chuang Mizoram-in a hmuh tur hmanga hmalakna tur ruahman dan hrang hrang te a sawifiah bawk. Pu Lal Thanzara chuan PWD officer te chu an hnathawh leh hmalakna te uluk lehzuala vil thin turin a chah bawk a ni. Kawlphetha chungchang sawiin Minister of State chuan kawlphetha siamchhuak tam thenawm state Meghalaya leh Manipur te aia Mizorama power kan neih that zawk dan te a sawi lang a, kawlphetha tam zawk siamchhuak tura sorkarin theihtawp chhuaha hma lak mek dan te a tarlang bawk. Health Minister chuan Medical Council of India-in a remtih chuan kum 2015 ah MBBS zirlai 50 awm theihna Mizoram Institute of Medical Education and Research (Medical College) Falkawn-a din tura chak taka hmalak mek a nih thu sawiin, Mizoram hmun hrang hranga Doctor leh Nurse indaihlohna phuhruk nan Sorkar chuan lak belh tura a bawhzui mek thu a sawi lang bawk.

Vawiin-a hawn Engineer-in-Chief, PWD (Architect Cell) Building, Tuikhuahtlang hi a building pumpui zau zawng chu 1195 sq.m. a ni a, Chief Engineer (Buildings) Design Cell leh Chief Architect Office bakah Staff Quarters 2 dah a ni bawk. Mizo chhiara in chhawng 5 neia sak a ni a, a chhung pawh hnathawktu te mamawh tur anga changtlung taka duan a ni a, motor parking atan ground floor pumpui ruahman a ni bawk a ni.

Engineer-in-Chief, PWD (Architect Cell) Office building hawnna inkhawm ah hian Environment & Forests Minister Pu Lalrinmawia Ralte, Parliamentary Secretary Pu K.Lalrinthanga, E-in-C PWD Er Vanlaltluanga leh E-in-C P&E Er L.Pachuau te bakah PWD officer leh staff thahnem tak an tel a ni.