Vawiin khan Lok Sabha MP Pu CL Ruala kaihhruaiin Aizawl District Development Coordination & Monitoring Committee (DISHA) chu DRDA Conference Hall, Aizawlah an thukhawm. Co-Chairman Rajya Sabha MP Pu Ronald Sapa Tlau bakah MLA - Pu Lalrinliana Sailo, Speaker; Pu Lalruatkima, Rural Development Minister; Pu C.Lalmuanpuia; Prof.F.Lalnunmawia; Er.H.Lalzirliana; Pu C.Lalsawivunga; Dr. Vanlalthlana; Pu Lalchhuanthanga; Pu VL Zaithanzama, Pu Vanlalhlana bakah Aizawl Mayor Pu PC Lalhmingthanga te an tel a ni.
Chairman Pu CL Ruala chuan kum sawm chhung DISHA meeting a lo kaihhruai tawhnaah MLA te leh offical-te tawiawmna a dawn zawng zawngah lawmthu a sawi a. Politician te chu term nei an nih laiin official te erawh mipui tana kum tam tak thawktu an nih avangin a bik takin thingtlang hmasawnna atan an pawimawh hle, a ti a, an service hun chhunga mi rethei zawkte hmasawnna thlentu nih tum theuh turin a fuih. DISHA meeting-in a tum ber chu Rural Development atana sawrkar laipuiin sum a pek te dik tak leh hlawk takin hman a ni em tih endik a nih thu sawiin MP chuan zalen leh tlang taka thu sawi turin member te a sawm a ni.
Co-Chairman Pu Ronald Sapa Tlau pawhin an hun chhungin Mizoramin eng hmasawnna thar nge a hmuh ang tih ngaihtuahna nen hna an thawh phawt chuan phur takin an thawk thei ngei ang, tiin member-te a fuih a ni.
July 2018 atanga January 2019, quarter hnih chhunga hnathawh te endik turin vawiin khan DRDA Conference Hall-ah meeting hi neih a ni a. Aizawl District huamchhunga Department 28 kaltlanga Centrally Sponsored Scheme hrang hrang 48 atanga hnathawh te enho a ni.
MGNREGA hnuaiah July 2018 atanga January 2019 chhungin Central leh State fund belhkhawm cheng nuai 5062.14 dawn a ni a, heta tang hian cheng nuai 4922.85 (97.25%) chu hnathawh nan hman ral a ni a. Aizawl District huamchhunga block 5 leh zone 2 awmah hna 298 thawh tawh niin heng hnate hi zawh fel zel a ni a . Mipui 27036 hnenah inhlawhna ni 80 inhlawhna siamsak an ni. IAY/PMAY-G hnuaiah hemi hun chhung vek hian cheng nuai 218.86 dawn a ni a, heta tang hian cheng nuai 211.63 chu in 161 sak tanpuina atan hman ral a ni.
PMKSY-WDC hnuaiah cheng nuai 273.47 dawn a ni a, heta tang hian cheng nuai 124.07 hnathawh nan hman ral a ni a. Heng fund atang hian watershed area 4225.99 hectare a zauah hnathawh a ni a, tui dahkhawlna leh horticulture/ afforestation atan mai bakah Self Help Group din nan leh tih changtlunna atan hman a ni. Shyam Prasad Mukherji Rurban Mission (SPMRM) hnuaiah Aibawk leh Thingsulthliah RD Block ah Rurban Cluster siam a ni a. Hna 15 thawh zawh tawh niin, hna 16 convergence a thawh mek a ni. Swachh Bharat (Grameen) hnuaiah cheng nuai 916.02 dawn a ni a, cheng nuai 709.51 (77%) hna thawh nan hman ral a ni. Heng sum te hi rural area a ek in sak nan te, Rural Mart leh Solid Liquid Waste Management atan te hman a ni a. Aizawl District huamchunga khaw 12 te hnenah Award pekchhuah a ni tawh bawk.
DDUGKY atan cheng nuai 658.33 dawn a ni a, cheng nuai 653.05 hnathawh nan hman ral a ni a. He scheme atang hian thingtlang mipui, eng la neilo te hnenah eng pek a ni a, BPL chhungkuate hnenah connection thar pek chhuah nan hman a ni bawk. AMRUT hnuaiah cheng nuai 285.82 hnathawh nan hman ral a ni a, heng sum te hi Urban Transport Footpath siam nan te leh Parks & Open Spaces siam nan te hman a ni. Mizoram Scholarship Board hnuaiah July 2018 atanga January 2019 chhung hian post matric & upgradation of Merit ST Students atangin zirlai 11,164 hnenah scholarship pekchhuah niin ST students 31630 hnenah pre matric scholarship pekchhuah a ni.
