Vawiin chawhnu dar 2:30PM khan Chief Minister Pu Lal Thanhawla chuan Serchhip DC Office Complex-ah MPSC Exam Centre a hawng. Serchhip DC Conference Hall-a hawnna inkhawm neih hi DC Pu H.Darzika'n a kaihruai a, hawnna thu sawiin Chief Minister chuan MPSC chu an sorkar hmasak laia an lo din anih thu leh member tur atan pawh mithiam, midik leh rinawm uluk taka ruat an nih thute a sawifiah a. MPSC chu sorkar chuan tihchangtlun zel tumin tunah pawh examination hall tur buaipui mek anih thu a sawilang a. Mizorama zirna thalo siam tha tura sorkarin Education Reforms Commission a din thute sawi nawnin India ram state zinga Mizoram chu Education Reforms Commission din hmasa ber an nih thute a tarlang bawk. MPSC Exam Centre hawn thar chu chhawr tangkai tura Serchhip thalaite chu fuihin taimakna leh tumruhna nen bei turin a fuih a, an zirlai tibuai pha khawpa khawtlanga inhmang buai lo turin a chah bawk.

Health Minister Pu Lalrinliana Sailo pawhin he hun hi hmanpuiin MPSC Exam Centre chu chhawr tangkai ngei turin thalaite fuihna thu a sawi bawk.

Vawiina MPSC Exam Centre hawnna programme hi Serchhip District NGO Co-ordination Committee(SEDNOC) buatsaih a ni a. SEDNOC Chairman Pu R.Laldaihzauva chuan Serchhip thalaite tana Exam Centre hawn a ni ta chu sorkar chungah lawmthu a sawi a. MPSC Jt.Secretary Pu Tamlal Lohar chuan MPSC hnathawh dan leh exam buatsaih dante a sawifiah bawk.