633/2022-2023
Aizawl the 25th May, 2022 : Vawiin khan Mizoram Public Service Commission (MPSC)-in a tihchhuah Coffee Table book “A saga of three decades” tia vuah chu MPSC Mini Examination Hall-a programme buatsaihah Planning Board Vice Chairman Pu H.Rammawi chuan a tlangzarh.

Pu H.Rammawi chuan MPSC kum 30 tlin champhaphak puala buatsaih, thlalak hlu tak tak leh kum 30 chhunga MPSC sulhnu pawimawh tak tak thailanna lehkhabu tihchhuah a ni chu lawmawm a ti a, hun leh kum a liam zel anga, he lehkhabu hlutna hi a pung tial tial dawn a ni, a ti.

MPSC chu Mizoram mipuite rinngam, a hmingchhiat sawi tur awm ngai lo a ni, tih sawiin Planning Board Vice Chairman chuan he an thianghlimna leh hmingthatna vawn nun zel hi Chairman leh member te kutah chauh a awm lova, officer leh staff mimal tin ten rinawm taka thawh chu an mawhphurhna a ni, a ti a. Pathian rawngbawlna rilru pu chungin mahni mawhphurhna zawn theuhah rinawm taka thawk chhunzawm zel turin a chah a ni.

MPSC Chairman Pu Lalramthanga Tochhawng pawhin thu sawiin MPSC in kum 30 zinkawng an zawh chhungin hmingtha taka vawiin a thleng thei chu lawmawm a ti a. State dang PSC-a thleng thin chanchin duhawm lo an nei ve ngai lo chu a lawmawm tak zet a ni, a ti. Pearl Jubilee ropui taka lawm an tum hripui leng vangin sukuk mah se, remhre taka kumkhaw rotling tur Coffee Table Book an buatsaih chu a lawmawm hle a ni, a ti a. Thlalak hian mit a la a, mite thinglungah thu tam tak a sawi a, thlalak dahkhawmna lehkhabu hmanga MPSC chanchin tha taka vawn that a ni chu lawmawm a tih thu a sawi a ni.

MPSC hi kum 1991 khan din niin kum 2021 khan an din champhaphak vawi 30-na an thleng tawh a. Amaherawhchu, hripui leng avangin lawmna hun an buatsaih thei lova, an Pearl Jubilee pual hian Coffee Table Book hi an buatsaih ta zawk a ni. He lehkhabu chhungah hian MPSC Chairman leh member lo ni tawh te thlalak, kum 30 a tlin kuma Chairman leh member te chanchin te, recruitment an lo neih tawh te leh thil pawimawh dang engemawzat tarlan a ni a. A din tirh atangin MPSC hian direct recruitment post 4000 zet an kalpui tawh a, DPC vawi 7000 chuang an thu tawh a ni.

Tunah hian Chairman Pu Lalramthanga Tochhawng, member pahnih - Er Vanlaltlana leh Pu Vanlalngaihsaka te an awm mek a. Gazetted officer 10 leh provisional employees leh muster roll workers tiamin staff dang 56 an thawk mek a ni.

Vawiin programme ah hian MPSC Secretary Er.Lalhriatpuia chu Chairman a ni a. MPSC Controller of Examinations Er. James Lalnunmawia’n inlawmna thu sawiin, Deputy Secretary Pu K Rosiamliana hnen atangin report ngaihthlak a ni a. Under Secretary Pu Ngurliana Hmar chuan lawmthu sawiin hun hnung a khar a ni.