632/2022-2023
Aizawl, the 25th May 2022 : Vawiin khan Rural Development Minister Pu Lalruatkima hovin a Office MINECO ah Khawzawl, Thingsulthliah leh East Lungdar RD Block huamchhunga khaw hrang hrangah te Shyama Prasad Mukherjee Rurban Mission (SPMRM) hnuaia hmasawnna hna hrang hrang atana ruahmanna duan te chu Pu R Zarzosanga, Secretary, Rural Development leh a thawhpuite leh heng RD Block BDO pathum ten an thlirho a ni.

Minister chuan SPMRM hnuaia Mizoramin Cluster a neih hmasak ber Aibawk Cluster hnuaia hna hrang hrang te chu thawh zawh tep a ni tiin mipui lamin an chhawr tangkai hle nia a hriat thu a sawi a. Chutiang bawkin Cluster dangah pawh mipuiin he Scheme hi an tangkaipui mek thu a sawi. Thingsulthliah, East Lungdar leh Khawzawl Cluster hnuaiah hian hna engemaw zat thawh tawh niin adangte pawh thawh mek a ni a. Vawiin meeting ah hian hna thawh tur la hmabak ruahmanna siam tawhte chu thlir ho niin Minister chuan BDO te chu uluk takin hna thawh anih hunah vil leh enpui turin a chah a.

SPMRM hnuaia hnathawh tawh thenkhatte chu - Mizoram Orchid Centre -Maubuang, Sateek Cycling Track, Cold Storage Seling, Market Shed Sesawng, Cultivation of aromatic plants, Mini- agro processing centre te, Tanky reservoir-te, Mini water pump-te, Solar street light te, Skill development te, Agri linked road te, inter village Road connectivity te, Construction of Pedestal footpaths te, Side drains leh PCC pavement te an nih bakah ranvulh lamah pawh hmalakna engemaw zat a awm a ni. SPMRM hian heng RD Block 4 hnuaiah khaw 48 a huam a ni.

SPMRM in a tum ber chu India rama States leh UT khawpui hnaiha awm thingtlang khua, khawpuia hmasawnna leh changkanna awm ang dawm kan theih tura ngaih khuate thlan chhuah a, tihchangtlun lehzual ani a. Hetiang khua thlan chhuah (Clusters/RD Block) te tichangtlung tur hian hma chi hrang hrang a la a. A langsar zual te chu - Khuaa mi cheng te tui thianghlim in tur hniang hnar taka pek te, mipuite ziak leh chhiar thiam tir mai bakah tunlai thiamna Information Technology hmang tangkai thiam (Digital literacy) tura zirtir te, ran enkawl dan tha, thil tharchhuah dah thatna (cold storage) lama hmalak te, inkalpawhna kawng tha zawk siam te, Bawlhhlawh paih leh sawngbawlna felfai zawk siam te, tourism, thalai thiamna (skill) tihpun leh zirtir te, renewable energy, hriselna lama awareness pek te, a thlawna inentirna (free clinic) buatsaih leh sub-centre a damdawi leh hmanrua pek te, Zirna In (school) tihchangtlun leh a dang te a huam a ni.

Rurban Cluster-a hmalakna tur atan project fund kalphung hi- 70% hi Convergence hmanga sawrkar Scheme hrang hrang dang atanga sum huikhawm leh a bak 30% chu Sawrkar laipui atanga lokal,Critical Gap Funding (CGF) hmangin hmalak a ni.

SPMRM hnuaiah India ram puma hnathawk tha thlan zingah Mizoram chuan kum 2016-17 khan “Best Performing States at National Level” ah Lawmman Pahnihna(2nd Prize Award) a la a. Hemi bakah hian Mizoram chuan kum 2018-19 leh kum 2019-20 khan “Best Performing States at National Level” Lawmman Pahnihna tho a la ve ve bawk a ni.

He Scheme-in a huam khuate hmasawnna tur hian hmachhawp/ruahmanna hrang hrang te a awm mek a. Chungte tihlawhtling tur chuan Rural Development Department, Mizoram Sawrkar chuan chak takin hma a la mek a ni.

Attachment

  • Loading attachment...