Nimin ni 28th October tlai khan Mizoram State Sanitation Task Force (MSSTF) chuan Tuirial Dumping Groundah bawlhhlawh paihna changkang leh changtlung zawk siam tura hmalak mekna chungchang sawihona an nei a, Meeting hi Dr.C.Vanlalramsanga, Secretary, UD&PA in kaihruaiin, member te hnenah tuna Tuirial Dumping Ground thlakna tur changkang leh mihring leh Boruak tana hrisel zawk Aizawl Municipal Solid Waste Resource Management System, SIPMIU in a kalpui mek thu member te a hrilhfiah a. MSSTF chu NEDP hnuaia climate change chungchang kalpuina tura a component tihpuitlinna tur anih thu a sawi a ni.

Er. Valbuanga, Program Director, SIPMIU chuan bawlhhlawh te thianghlim taka sawngbawlna hmun tur New Engineered Sanitary Landfill chu chak taka hnathawh kalpui mek anih thu hrilhfiahin, Aizawl khawpuia in tinah bawlhhlawh te hi a tawihthei leh tawihtheilo a thliarhranna tur chhungkaw 71438 hnenah Dustbin pahnih theuh sem a nih tawh thu leh Awareness pawh February 2016 khan zawhfel anih tawh thu a sawi a. Hemi bawhzuina tur hian November thla atangin House to House campaign neih tan nghal ani leh mek a ni tih sawil bawkin, bawlhhlawh thliarhran sa te lakkhawmna tur Colour coded Garbage Vehicle (407 LPK Truck) 54 nos. pawh kum 2017 chhunga hman theih turin Contracter pawh letter of Acceptance neih tawh anih thu leh bawlhhlawh te thianghlim taka sawngbawlna tur hmun New Engineered Sanitary Landfill contract Agreement pawh 1 july, 2016 khan sign anih thu member te a hriattir a. Hna thawh zawh hun tur hi kum hnih leh a chanve, December 2018 a ni a, Tuna Bawlhhlawh paih mekna Turial Dumpimg Ground pawh hi then thianghlima khar a ni nghal dawn a ni a ti. Hemi bakah hian Bawlhhlawh sawngbawl leh enkawlna kawnga hnathawktu zawng zawng te hman tur Personal Protective Equipments/Garbage Trolleys pawh hman vek anih theihnan SIPMIU leh AMC tangkawp chuan a lei dawn a ni a ti.

New Engineered Sanitary Landfill ah hian bawlhhlawh tawihthei atanga Leitha Siamna hmun nitin TON 22 sawngbawlna Vermi Compost Plant leh nitin TON 50 sawngbawlna Mechanical Compost Plant hna hi thawh mek a ni a. Bawlhhlawh tawihtheilo te nitin TON 74 Recycle/Resell/Reuse leh tura sawngbawlna hmun Dry Waste Resource Centre pahnih Aizawl tlak lam Industrial Growth Centre ah siam mek bawk a ni a. Bawlhhlawh hmantlaktawhlo te thianghlim taka phumbo na hmun Engineered Sanitary Landfill pawh hi kum 5 daih tur SIPMIU hian tunah a thawk mek a, he hmun hian kum 25 chhung hman theih tur niin, hman theih anih hun kum 2018 atang chuan Tuirial Dumping Ground hi thenfai leh khar nghal a ni tawh ang.

Mizoram sorkar chuan MSSTF hnathawhna turin kum 2016-2017 chhung atan Rs,25 lakhs a ruahman a ni.