Zirlai leh thalaite chona leh fuih tharna atan MSU Regional Headquarters Lunglei chuan kawng hrang hranga entawn tlak mi panga leh pawl pakhat te chawimawina hun ‘MSU Award 2018’ chu vawiin khan Convention Centre Lunglei ah an buatsaih. Lunglei DIPRO Pi C.Lalremruati, MIS chuan khuallian niin he hun hi a hmanpui.

He hun Pu Biaksiamtluanga President MSU Regional Hqrs. Lunglei kaihhruaiah hian Pi C. Lalremruati DIPRO Lunglei chuan MSU Regional Headquarters ten thalaite hmakhua ngaia programme hlu tak an buatsaih avangin an chungah lawmthu a sawi a. MSU Award 2018  chawimawina dawngtute atang hian zirtur tamtak kan nei a, an taimakna leh tumruhna, teirei peihna, mahni inrintawkna leh an chhelna te hi kan entawn a ngai a ni, a ti. Zirlaite pawhin kan zirna kawngah taimak kan chhuah mai piah lamah kan hmalam hun tur fel taka ruahman sa a tul hle a ni tiin chu chuan eizawnna kawnga kan hun tawnah tul lova hun paihralna tur nasa takin a veng thei a ni, a ti a. Zirlaite chu hna thawh hreh leh thawh zah neilo tura chahin taima tak leh tumruh taka hlawhtlin hi a rintlak in a tlo bawk thin tih hre nawn leh fo turin a chah bawk.

Khualzahawm Pu H. Lalthansanga President MJA Lunglei Dist. pawhin mahni insengso a MSU ten chawimawi tlak an chawimawi chu midangte ti phurtu a nih a rin thu sawiin zirlaite chu ram nghahfak an nih angin theihtawp chhuah a mahni intodelh nan thawh hreh nei lo turin a fuih bawk.

He program uaptu MSU General Hqrs. President Pu RB Lalmalsawma pawhin zirlaite hamthatna leh chanvo hrang hrang theih tawp chhuaha haichhuah hna an thawh thu leh zirlaite hna ber chu zir a nih angin zir sauh sauh turin zirlai kalkhawmte a fuih a. Mizote zingah Central Service inziak tling kan tlem ta hle chu pawi a tih thu sawiin heng exama tling thei turin zirlaite chu tum mumal tak leh hmathlir nei rana lehkha zir zel turin a fuih bawk. Zirlai, ram leh hnam tan theihtawp chhuah zel an tum thu a tarlang bawk a ni.

Vawiina MSU Regional Hqrs. Lunglei ten an chawimawite ‘MSU Award 2018’ dawngtute - 

1.    Pi Kawlziki, Sertlangpui khua, mizo nu zinga fa hring tam ber ni a hriat niin fa 20 lai mai Pathian malsawmna in a nei a ni.

2.     Pu Chhuanmawia Haulawng khua, khawl chi hrang hrang mahni irawm chhuak a siam thinin La hlumna khawl, Puantahna khawl, chhawhchhi hrual mumna khawl, Changel channa khawl te a siam chhuak a ni.

3.    Pu H Laltanpuia Electric Veng, MSc Botany niin mahni intodelh tuma vawk za chuang a vulh a ni.

4.     Pu Joseph H. Thanzuala, kuthnathawktute tana a hun pumpui petu, AMFU President.

5.    Tv. H. Laldinmawia, Zohnuai Lungleia Sahbawn siamna hmunpui dintu. Lushai Soap Industry dinin tunah hian eizawn nan an hmang mek a ni.

6.     Lunglei Town Mutia Association, kum 1994 khan din niin member 42 an nei mek a. Hnam dang tel miah lova bungraw thiar leh sem hnathawktu te an ni.