Sawrkar laipuia Ministry of Social Justice & Empowerment hnuaia Composite Regional Centre, Department Of Empowerment of PwD’s leh Bethesda Hospital & Research Centre, Aizawl tangkawpin ni hnih awh “Recent Development in Disability Rehabilitation: Debates & Dilemmas” tih thupui hmangin seminar a buatsaih chu vawiin khan Synod Conference Center-ah a kharna hun Pi Vanlalawmpuii Chawngthu, Chairperson, Mizoram State Women Commission chu khuallian niin a hmanpui.

Khuallian chuan rualbanlote hmasawnna leh an nakin hun thlir a, an tana seminar buatsaih a ni chu a lawmawm a tih thu a sawi a. Ram hmasawnna sang zelah ram leh hnam changkang apiangin rualbanlo te an ngaihsakin an hmasawnna an ngaihpawimawh em em a, anmahni tanpui a, enkawlna lamah pawh hma an la nasa hle a ni tiin, Mizoram sawrkar pawhin rualbanlote dinhmun pangngai taka an din a, kawng pangngai tak an zawh theihna turin remruatna fel tak nei in, hma a lak thu a leh, anmahni enkawlna tur leh chhawmdawlna atana sawrkarin hna 3-4% a siam sak thu a sawi a ni.

Seminar kharna hun hi Dr. Biakmawia'n a kaihruai a, kohhran pawl hrang hrang atanga mi sawm bik tel an tel a ni.