2674/2024-2025

Dated Hnahthial, the 24th October, 2024: Vawiin khan Indian Medical Association (IMA), Mizoram Government Doctors' Association (MGDA) leh Indian Dental Association(IDA) tangkawp buatsaih, a thlawna in entirna hmun- 'Multidisciplinary Clinic' chu Hnahthial District-ah buatsaih a ni a. Mizoramah Multidisciplinary Clinic buatsaih vawi 10 na a ni.

Multidisciplinary Free Clinic hawnna hun tawi hman niin Dr. Lalhmuchhuaka, IMA Clinic Convener chuan hawnna hun hi a kaihruai a. Bawrhsap, Pi Rita Lalnunmawii Pachuau chuan hawnna hunah hian thu sawiin Hnahthial mipuite mamawhna ngai pawimawh a Doctor rawn kal zawng zawngte hnenah lawmthu a sawi a. Mipui kalkhawmte hnenah chuan he hun tha hi bawhpelh lova hman tangkai a, inentir theuh tura chahin inentir zawng zawng ten damna an chan phah ngei a beisei thu a sawi a ni.

He inentirna hunah hian damdawi a thlawn a sem tur chu bialtu MLA, Pu Jeje Lalpekhluan a buatsaih sak bawk a ni.

Clinic-ah hian inentirna hrang hrang - Obstetrics and gynaecology (hmeichhe lam); Nephrology (zunkawng leh kal); Cardiology (lung lam); Medicine; Respiratory medicine; Surgery; Paediatrics (Naupang); Orthopaedics (Ruh lam); Dental (ha); ENT (beng, hnar leh hrawk); Opthalmology (mit); Dermatology (vun lam); Psychiatry (rilru lam); PMR (tha na) leh audiology (beng lam) te hawn a ni a. Heng bakah hian Pharmacy (damdawi lam) thiam leh Endoscopy leh Ultrasound hmanga damlo endiktu tur Endoscopist leh Sonologist te an awm a ni.

He clinic-ah hian a vaiin doctor 50 awmin supporting staff 11 an awm bawk a. Heng doctor leh staff te hi Synod hospital; Ebenezer Medical Centre; Zoram Medical College; Christian hospital, Serkawn; Civil Hospital, Aizawl; District Hospital, Hnahthial; Aizawl Hospital; District Hospital, Serchhip; Kulikawn Hospital; Trinity hospital leh Civil Hospital Lunglei atanga rawn kal te an ni.

He clinic hi ni hnih awh tura ruahman niin naktuk thleng neih a ni ang.