2675/2024-2025

Aizawl the 24th October, 2024 : Govt. Hrangbana College-a Mizo Department leh Mizo Language Development Board tang kawpin an buatsaih James Dokhuma kut chhuak thawnthute zir hona 'National Seminar on Exploring the Fictions of James Dokbuma: A Critical Perspective' tih chu vawiin khan Hrangbana College Conference Hall-ah hman a ni a. Chawhma lamah Seminar hawnna hun neih niin Hrangbana College Principal Lalthlengliana Hrahsel chuan inlawmna thu a sawi a. He huna thupui sawi hawngtu Pu R. Lallianzuala, Mizo Language Development Board Chairman ni bawk chuan James Dokhuma thawnthu ziah thiamzia te, a thawnthu ziahte hmanga Mizo Culture a lo vawn nun ṭhatzia te, lehkha zir sang lo tak ni chunga ren tin daih lehkhabu ziak thei a nih si dan te bakah a lehkhabu ziah hlu tak takte hmanga Mizo ṭawng tihausatu leh tihmasawntu a nih avanga Mizo zinga Bhasha Samaan dawng hmasa ber a nih dan te, Language and Literature huangah Mizo Zinga Padma Shree dawng hmasa ber a nih thu a sawi. Hei bakah hian Pu R Lalrawna, Pu B. Lalthangliana leh mi hrang hrangin a chanchin an sawi bawk.

Chawhnu lamah a thu leh hla zir chianna hun hman chhunzawn a ni a, College leh University-a zirtirtute leh Research Scholar-te bakah mi thiam hrang hrangin James Dokhuma thawnthu kawng hrang hranga an zir chianna paper an chhiar bawk a.

Ni hnih awh he National Seminar-ah hian thupui hrang hrang sawm leh pariat sawi ho tura chhawp chhuah a ni a, heng thupui hrang hrang hmanga thuziakte hi remchangah lehkhabua la tih chhuah tum a ni. Seminar hi naktukah chhunzawm leh tur nin nilengin James Dokhuma thawnthu zir honaa hun hman a ni ang.