No.490/2020-2021


Mumbai Mizoram House a awm mek cancer vei damlo pahnih leh damlo awmpuitu zing ami pakhat te bakah House a thawk hnamdang mi pakhat COVID-19 vei hmuh chhuah thar an ni.

Vawiina Secretariat Conference Hall, MINECO a sawrkar hotu pawimawhte thutkhawmnaah Healh Minister Dr. R.Lalthangliana chuan he thu hi sawiin, April ni 14 a Mumbai Mizoram House a awm mi 20 sample test result April ni 18 a hriat a nih khan COVID-19 positive pathum hmuh chhuah an ni a, April ni 18 khan la test ve loh ho zawng Mizoram House a thawkte telin mi 35 sample test leh a ni a, April ni 19 zanah an test result hi hriat niin an negative vek a ni, a ti a. Hetih rual hian April ni 19 khan a hma April ni 14 a sample test zinga negative ho mi 17 bakah House a thawk hnamdangmi la test ve loh te chu sample lak a test leh a ni a, tukin khan an result hriat niin vanduaithlak takin an zinga mi pali – cancer vei pahnih leh damlo awmpuitu pakhat (a awmpui cancer vei erawh test a negative thung) bakah House a thawk hnamdang mi pakhat chu COVID-19 positive hmuhchhuah an ni, a ti a. Maharashtra sawrkarin rang taka hma la nghalin cancer vei COVID-19 positive pahnihte chu COVID-19 natna veite enkawlna tur bika siam damdawi in “Seven Hills Hospital” ah dah luh nghal an ni a, midang pahnih erawh chu Quarantine Facility ah dah an ni tih a sawi a ni.

Health Minister chuan Mizoram House a awm leh thawktute zinga COVID-19 natna vei hmuhchhuah tawh zat chu pariat an ni tih sawiin tun dinhmunah erawh heng natna veite hi ngaihtuahawm an nih loh thu leh enkawlna tha tak an dawn ngei tur thu a sawi a. COVID-19 hi natna tharlam, mithiamte pawhin an zirchian mek natna chimawm tak leh hriatthiam har tak a ni tih sawiin, sample test negative, a hnu a test that leh a positive a ni tih hmuhchhuah leh ang chi ‘false negative’ hi hmun tamtakah hmuhchhuah a lo ni tawh tih a sawi bawk.

Health Minister chuan COVID-19 veite hming, thlalak leh nihna tarlang thei thil reng reng social media leh thildanga puangzar lo turin mipuite a ngen a ni.