Chief Minister Pu Lal Thanhawla chuan music leh fine art lam hi Mizote chem kalna a ni a ti. He thu hi vawiina Canteen kuala Daifim Art Gallery kum 10 tlin champhaphaka art exhibition Pu Lalbuta buatsaih a hawnna a a sawi a ni.

Chief Minister chuan an hun hmasa lamah kut themthiamna hmanga lemziak leh lemtuk lam chawikan tumin hma an lo lak tawh thin thu a sawi a.Thil hi hriat ringawt ai chuan a taka hmuh ngei hian a mawina leh a hlutna te kan finfiah thei a, lemziakte pawh chutiang chu a ni a ti. Art ngaihsanna chang hriate hi mi pangngai chin chunglam an ni duh khawp mai tiin, Daifim Art Gallery tlawh thin tu an sawite pawh hi khualzin miliante leh sipai lal te an ni thin a ni a ti.

Mizo lemziak mite chawikan tuma Delhi ah leh Kolkata ah te Art Exhibition sorkarin a buatsaih sak tawh thu sawilangin, Chief Minister chuan kan Mizote kutchhuak hi phailam mite pawhin an hlut hle a ni a ti a. Infiamna lama thalaite talent cho chhuah tham awm hi a theih ang anga haichhuah mek anih thu sawiin, lemziak lamah pawh cho chhuah tham Mizote zingah a awm a, cho chhuah dan kan la thiam tawklo mai a ni a ti. Hemi lamah hian sorkar pawhin hma lain, a tum khatna atan lemziak lam atan leh lemchan (film) lamin hma a sawn theih beiseiin budgetah sum engemawzah a dah a ni a ti.

Chief Minister chuan art hlutna hriaa mahni sum senga hetiang art gallery kum 10 chhung enkawl a ni chu a fakawm tak zet a ni a ti a. Mahni thahnem ngaihna avanga harsa tak chunga lemziak mite an kal chho hram hram hi sorkar ang pawhin tanpui tlak leh thawhpui tlak an ni a ti a. Art zirna a degree nei tawhte leh doctorate degree bei mekte Zofate zinga kan awm chho ve ta te hi a lawmawm a, min ti phur hle a ni a ti.

Daifim Art Gallery Exhibitionah hian Mizo artist hrang hrangte kutchhuak pholan a ni a, chawhrualin gallery ah hian lemziak 30 atanga 40 vel awm reng anga chhut a ni.

Exhibition inkhawm hi Pu Vanneihtluanga’n a kaihruai a, lemziakmi thahnem tak an tel a ni.

Chief Minister hi a nupui Pi Lal Riliani bakah Parliamentary Secretary Pu Lalthanzara ten an tawiawm a ni.