Buh thar ti pung tura Agriculture department-in System of Rice Intensification(SRI) hmanga hma a lakna ah hlawhtlinna hmel a lang chho zel a. Nikum a Mizoram buh thar chu a hma kum aiin 10% in a pun bakah kumin ah hei aia tam pung turin beisei a ni, tih Agriculture Director Pu C.Lalzarliana chuan Press mite a hrilh.

Press miten vawiin khan Dihmunzawl-a SRI hmalakna, Pi Kaphliri buh hmun an tlawh a. Ram 0.6 Ha. a zau ah buh tin 150-180 inkar thar thin, Pi Kaphliri hian kum 2009 a SRI hmanga buh a chin hnu in, a kum khat na ah tin 200 chuang a thar nghal a, nikum khan tin 300 tharin kumin ah a aia tam thar an in beisei tih Press mite chu a hrilh a. SRI tih dan anga buh zai khat zel inches 10 vel dana phun chuan peng 50-70 lai te neiin buh te pawh an hrisel tha hle a ni. Helai hmun ah hian buh KRH-2 an ching a, thla 4 hnuah sengin thlasik thlai an chin chhunzawm leh mai thin a ni.

Mizoramah hian buh leh thlai chinna hmun zau zawng chu 1,38,566 Ha. niin leilet(WRC) siam theihna hmun 74,644 Ha vel a zau a awm a, leilet siam tawh zat chu 12,700Ha. a ni. Tlangram lo neihna hi 25,826 Ha. a ni a. Agriculture department chuan tun 12th Plan chhung hian Mizoram buh thar tipung turin nasa takin tan an la mek a. Tuna kan buh thar hian Mizoram buhfai mamawh 29% chauh a la phuhruk avangin 50% ah tihpun tum a ni a. Hemi atan hian leilet tam zawk siam leh tlangram lo neihna hmun sawr zim te, tlangram lo neih dan siam that te chu Agriculture hmalakna tur pawimawh a ni a. SRI hmang hian nasa takin buh thar a pung thei tih enchhinna hlawhtling tak neih a nih tawh avangin tunah hian Mizoram hmun hrang hrang ah a takin SRI hi kalpui mek a ni a. Hmun tlemte ah tih loh chuan SRI hi loneitu ten an hlawhtlin pui hle a ni. Agriculture department chuan SRI hmalakna hi a hlawhtlin theih nan nasa taka tan la in officer ten an bial theuhvah loneitu te an vil chawt a. Monitoring team 2 insiamin Mizoram pum hi vawi 2 an fang chhuak tawh nghe nghe a ni.