No.3405/2020-2020

Vawiin khan Mizoram Youth Commission Chairman Dr Vanlaltanpuia chuan a bial chhung Zohnuai, Lungleia NEC sum cheng nuai 871 senga ruahman tur Lunglei Science Centre & Digital Planetarium lunghpum a phum.

Vawiin program ah hian a kaihhnawih sawrkar Department official-te bakah science zirna in school leh college hotute, khawtlang hruaitute, tlawmngai pawl te leh Lunglei MJA hruaitute  leh sawm bik dangte an tel a ni.

Dr. Vanlaltanpuia, MLA, Chairman, Mizoram Youth Commission chuan Mizorama Science Centre pahnihna tur Lunglei Science Centre & Digital Planetarium chu Mizoram mipuite, a bik takin chhim lam District - te tan malsawmna ropui tak a ni tiin he Science Centre & Digital Planetarium neih theihna tura hun leh tha leh ngaihtuahna lo sengtu zawng zawngte a bik takin official-te, Ex MLA Pu Joseph Lalhimpuia, leh khawtlang hruaitute  chungah lawmthu a sawi a. Science Centre & Digital Planetarium din na tur hmun phal taka pe tu Zohnuai khawtlang leh School Education Department-te chungah lawmthu a sawi bawk.

MYC Chairman chuan tunlai khawvelah Science and Technology in mihringte nunah hmun pawimawh tak a luah tawh a, Science and Technology lama hmasawnna nei chak apiang ram economy a thang duangin kawng engkimah hma an sawn chak a ni tiin Mizoram pawhin hemi kawngah hmasawnna tur tam tak kan la nei a, nasa taka tan kan lak a tul a ni, a ti a Hmasawnna tluantling nei turin zirna kan ngaih pawimawh hmasak a tul takzet a ni tiin kan thalaiten zirna lama hma an sawn zelna tura kawng kawhhmuh  turin nu leh pa, khawtlang hruaitute leh tlawmngai pawlte kawng hrang hranga thawhho puia hmalak puiah a sawm a. Lunglei Science Centre & Digital Planetarium building sak chu uluk taka vil a tum thu sawiin contractor-te pawh hna tha taka thawk turin a chah nghal a ni.

Lunglei Science Centre & Digital Planetarium lunghpum phum puala program hi Pu F. Lalramchuana, Senior Curator, Mizoram Science Centre & Senior Scientific Officer in a kaihruai a. DR RK Lallianthanga, Chief Scientific Officer and Member Secretary, MISTIC pawhin thu sawiin Er Zirsangliana, EE PWD, Building Division Lunglei in Technical Report a pe a ni.

Lunglei Science Centre & Digital Planetarium project hi a vaiin cheng nuai 871 a ni a. District Science Centre building, Digital Planetarium building leh Type II Quarter pahnih sakna tur bakah Science Centre leh Digital Planetarium-a hmanrua hrang hrang leh pho lan tur (exhibit items) te leina a huam vek a ni. District Science Centre building, Digital Planetarium building leh Type II Quarter sa tur hian contractor Pu KT Nghawra, Zohnuai, Lunglei thlan a ni. Project pumpui hi December 2021 ah zawh fel tum a ni.