2902/2024-2025

Dated Aizawl: the 08 November 2024: Vawiin (08-Nov-2024) khan Pu Malsawmzuala Ralte, Mizoram Youth Commission Chairman chuan MYC Conference Hall, MINECO Khatla ah Mizo thalai RK Enterprise, (Daikin AC Manufacturing) Sri City a hnathawk tur mi 10-te chu thingpui inpuiin fuihna hun a hmang.

He hunah hian Pu Malsawmzuala Ralte, MYC Chairman chuan hnathawka kal turte chu Pathian tihna, tumruhna, leh taihmaknate nun pui tlat tur a fuihin, chhel taka awm turin a chah a. An awmna hmun a an chet velna leh awmdan apiang chu hnamdangte hmuhah chuan Mizo awmdan tih anih zel dawn avangin Mizo hnam aiawh an ni tih hria a, theihtawp a nun uluk turin a fuih bawk a. Tun a lo zuk kal hmasate chu Mizo thalaite tana kawng sat tu an nih avangin an thalai puite tan a awlsam leh tha zawka kawng sialsak tu ni turin a fuih nghal bawk a ni.

Heng thalaite  Hnathawhna tur hmun RK Enterprise, (Daikin AC Manufacturing) Sri City hi Mizoram Governor Dr. Hari Babu Khambampati leh MYC Chairman-te chuan  a hmuna an lo zuk enfiah hmasak zet hnuah, MYC leh RK Enterprise te chuan  thawhhona thuthlung (MoU) siamin Mizo thalai te hi thawn thlak an ni dawn ta a. Thalai 100 chuang mamawh nih mahse, tun tumah hi chuan a hmasa ber  atan mi 10 te hi thawn thlak hmasak zet an ni ta a ni.

Vawiin a  hun hmannaah  hian damlohna avanga tel remchang lo mi 3-te tih loh chu an tel kim hle a. Hnathawk a kal turte hian ni 11 November, 2024 (Thawhtanni) hian Aizawl chhuahsanin an hnathawhna tur an pan ang a. Guwahati thlengin MYC Official ten an thlah dawn a ni.