Lunglei East Constituency chhunga Puanthuitute leh Mistiri thlan bikte hman tur bungrua NEDP sum hmanga lei chu Mizoram Youth Commission Chairman Pu Joseph Lalhimpuia’n vawiin khan a sem.

Bungraw semna inkhawm  Pu C. Lalbiakkima kaihhruaiah khuallian Pu Joseph Lalhimpuia chuan thu sawiin hmanrua tanpui nana sem te hi a dawng awm tak tak ten an dawng niin ka hmu a, chhungkaw chawmna leh dinchhuah nan inhman ngei ka duh a ni, a ti a. Ram hmasawnna turin sawrkarin chak takin hma a la chhunzawm zel dawn a ni tiin hun kalta aiin mipuite pawhin hma kan sawn a ngai a, eng kawngah pawh tih tak takna leh tumruhna kan neih a ngai a, chu chuan hlawhtlinna ropui tak min thlen dawn a ni a ti a. Mizo thalai tam zawk ten mahni kutkawih ngeia eizawnna an neih theihna turin NEDP kaltlangin hmalak chhunzawm zel a nih tur thu chu Mizoram Youth Commission Chairman hian a tarlang bawk.

Vawiina bungraw semah hian Lunglei East Assembly Constituency bial chhunga Puanthui thiam mi 38 te hnenah Puanthui khawl pek an ni a, Mistiri thlanbik mi 15 te hnenah an hman tur pawimawh mistiri bungrua hlan an ni bawk.