Vawiin chawhma khan Planning Minister Pu Lalsawta chuan Assembly Annexe Conference Hall-ah Mizoram Youth Commission buatsaih, MYC Youth Summit & Road Show vawikhatna chu a hawng. Aizawlah chuan vawiin leh naktuk thleng hian Youth Summit & Road Show hi Assembly Annex Building chawng hnuaiah neih a ni dawn a. Tunthla leh thlaleh chhungin MYC Youth Summit & Road Show 2018 hi Kolasib, Mamit, Champhai, Serchhip, Siaha, Lawngtlai leh a tawp berah Lunglei khawpuiah te buatsaih tum a ni.
MYC Youth Summit & Road Show 2018 khuhhawnna neitu Planning Minister Pu Lalsawta chuan Mizoram chuan hmun dangte neih phaizawl zau tak te leh Tuifinriat kam lawngchawlhna remchang te nei lo mahse ramdangte neih loh sik leh sa nuam tawk chiah, boruak thiang leh thlai chitin ngeih ram leilung hrisel awmna a ni thung a. A chhunga chengte lah tawng pakhat hmanga inbepawp thei vek leh ziak leh chhiar thiam tam na a ni, a ti a. Chung zawng zawng chuan Mizoram chu mi chitin reng tana dinchhuah leh hmasawn tura remchanna hmun, The Land Of Opportunity ah a siam a ni a ti. "A chhunga mipui te hian he remchanna hi kan hmang tangkai em? A bikin kan thalai te hian he remchanna hi chhawr tangkaina chang an hria em? Vawiinah hian thalaiten enge in tih dawn tih hi in hma a chona kan rawn thehthlak chu a ni", a ti. Planning Minister chuan, " Hun rei tak atang khan kan state chhehvel atanga kan thawh duh loh rawn thawk te chuan 'remchanna hmun, Mizoram' hi an rawn chhawr tawh a. An hlawkpuiin an hauhsak phah tawh a. Tun thlenga remchanna kan siam sak zel hi chu a uihawm tawk tawh a ni", a ti a.
"A huho leh pawl anga sumtuak nan chuan Mizo thalai tam zawk te chuan midangte thuamhnaw bal, mi kawmkar thenfai leh thil tawphnawk thenfai chenin kan hreh lo a. Chhungkaw tana ei leh bar hmuhna tura blanket suk, mi inchhung tawphnawk thenfai te kan zak leh si a. Kan in enfiah a hun tak zet a, ei leh in hmuh theihna tur a nih phawt chuan eng hna mah thawh a zahthlak lo tih kan hriat a ngai a ni. Chutiang rilru kan put hunah chuan hnamdangte hian kan state ah hnathawh tur an neih a rinawm loh a ni", a ti. Pu Lalsawta chuan Mizoten mi hnuaiah hnathawh kan thiam a tul thu sawiin mi hnuaia sum tuaka hnathawk chuan a hnathawh hun kha a ruaitu hnenah a zuar tel tih a hriata, a ruaitu duhdan a zawm pawh a ngai tih a sawi a. Hnamdangte chuan anmahni ruaitute duhdan hnial lo in an thu an awih mai thin a; chu chu mi tam tak pawn tualchhungmi aia an thlan fo thin zawkna chhan pawh a ni thei awm e tiin midangte tana hnathawhdan thiam tel pawh a tul tih a sawi a ni.
MYC Youth Summit & Road Show 2018 chungchang sawihawngtu MYC Chairman Pu Joseph Lalhimpuia chuan Mizoram thalai ten a thuphungin 'Thalaite hun, Thalaite khawvel..ka nun a nia ka thu thu..' tih rilru puthmangah chiah an nei ta emaw chu tih theih khawpin thalai tam zawk chu hmasawn tum lo, phone, lirthei leh social media vela buaitawk an tam tih zirchiannaah a lang chiang a. A chhan chu Mizoram chhunga hnathawk tamber chu state thenawm a hnamdang mite an ni a. Mizoram a Mizo chhungkaw tina eizawngtu ber te pawh kum 50 chunglam deuh vek a ni a. Chu chuan 'Thalai ten enge an tih?' tih zawhna a rawn siam lo thei lo a ni a ti.
"State thenawm nen thu inhmuhfuhloh chang apiangin Aizawl khawpui chhunga insak hna zawng zawng deuhthaw a chawl thuam zel chu Mizo thalaiten eng vang nge? Engngatinge hna a chawlh thuap zel tih kan ngaihtuah chian a hun tawh tak zet a ni", a ti a. India sawrkar hnuaia hna pawimawh ber ber chelh thei IAS, IPS leh a dangte pawh kum engzah chhung nge kan neih tawh loh tih chhut chuan rualawh a na duh tak zet a. Hetiang karah hian thalai entawn tlak enge mawh zah an la awm a, chung te chu midang chawhphur nan sum leh paiin tanpui zel kan tum dawn a, a hlawhtling zual thlanchhuah te phei chu Rs 1,00,000 kengtel Young Achiever Award hlan an la ni dawn a ni", a ti. Pu Joseph Lalhimpuia chuan Mizoram dinhmun en in thalaite kaiharh a hun tawh tak zet tih sawrkarin a hmuhchian em avangin MYC Youth Summit & Road Show 2018 pawh buatsaih a nih thu a sawi a. He mi chhung hian hnazawng mek te tan hnathawh tur leh a kal kawngte kawhhmuh an ni ang a, Zirlaite tan zirtur inkawhhmuh nan te, hmasawn zel tura Mizo thalaite chawhphura fuihna leh inzirtirna hun atan te bakah skill development lama thalaite mamawh inkawhmuh nan tangkai taka hman a ni dawn a ni a ti a. "MYC chuan "Thalaite khawvel i zauh ang aw" tih auhla nen Mizoram thalaite hmasawn nan theihtawp a chhuah zel dawn a. Hemi kawngah hian MYC hmalakna mai a tawk dawn lo tih a chiang a, chuvangin NGO leh Kohhran ang te pawhin kan thalaite hmasawnna kawnga midang rual awhna chang an hriat theih nan theihtawp chhuahtlang zel turin kan insawm a ni a ti."
MYC Youth Summit & Road Show 2018 Aizawlah hian Sawrkar Department 9 in Stall 14 leh Private/Agencies 21 ten Stall 40, a vaiin Stall 54 hawn a ni a. Hna zawng mek te, zirna sang zawk zirtum te, training tur zawng mek te leh sumdawnna kawng dap tur chen in an tangkai pui tura beisei a ni a. Pawl 5 chin hnuailam atanga thiamna sang tak tak nei tan pawh chhim theih tura buatsaih a ni. Stall-ah te hian hriatchian duh ang te chu a zawh a zawh theih chi te, a lem a en ang chi bakah a ziak a chhiar theih tur thlengin chhawp a ni ang. MYC Youth Summit & Road Show 2018 hi Kolasib-ah April Ni 24, Mamitah April ni 27, Champhaiah May ni 4, Serchhipah May ni 9, Siahaah May ni 15, Lawngtlaiah May ni 18 ah te leh Lungleiah May ni 23 leh 24-ah a kharna hun neih a ni ang.
Vawiin a MYC Youth Summit & Road Show 2018 khuhhawnna inkhawm hi Planning Secretary Dr.C. Vanlalramsanga'n a kaihruaiin LEDSE Joint Secretary Pu Lalrinsanga'n lawmthu sawina hun hmangin a khar a. He hunah hian MYC Cash Incentive Award, a Sumfaiin Rs 50,000/- theuh hna hmuthar mi 5 - Laldingngheta, Short Service Commission, Lalthianghlima, Banking, Lalramliana Khiangte, Banking, Clement Lalchhuanmawia, Agriculture Research Service leh H.Lalzampuia, Agriculture Research Service te hnenah hlan a ni a. MYC Youth Summit & Road Show hi hnazawng mek, zirlai leh official thahnem takin a chhim a. He hunah hian LEDSE Minister Pu H.Rohluna, Nodal Minister ni bawk te, Deputy Chief Whip Pu RL Pianmawia, MLA, MYC Vice Chairman hlui pahnih Pu Hmingdailova Khiangte, MLA leh Pu T.Sangkunga, MLA te pawh an tel a ni.
