Vawiin khan Siamliana Hall, Mamitah Mizoram Youth Commission huaihawtin MYC summit leh Road show , 2018 neih a ni. Pi Lalbiaksangi, District Bawrhsap chuan khuallian nia hmanpuiin Summit & Road Show hawnna hun a nei.

He hun hmanpuitu Pi Lalbiaksangi chuan Mamit District mipui leh thalaite hmakhua atana kawng sut ensak tura Summit leh Road show buatsaihsaktu Mizoram Youth Commission-te chungah lawmthu a sawi a, thalai lehkha la zir mekte leh degree nei tawhte pawh General line ringawta kal lovin mahni ke a ding thei tura kawng zawh tur thlang thiam turin a chah a. Kan tun dinhmunah chuan kan thalaite hi kan la nung/ harh tha tawk lo a ni a ti. Keimahni hmun ngeia kalchilha kan kawng zawh tur thlan kawngah leh kan zir leh zelna tur atana kawng hrang hrang inkawhhmuhna buatsaih chu hlawk taka hmanga tlawh theuh turin Mamit District chhung thalaite a chah a ni.

District Bawrhsap chuan Mamit District Bawrhsap a nih chhunga khawtlang hruaitute thawhpuinaah lawmthu a sawi a, Mamit District thalaite chu tam zawk sipai a lut tura a duh thu sawiin ama thahnemngaihna leh District Officer-te hmalaknain kum 2016 khan sipai tang tur training an pekah mi 2 te lak an ni chu lawmawm a tih thu a sawi. Thalaite chu thiamloh kan neihte thiamlo nih hreh lo ila, thiam tuma tan lak nachang erawh hria ila, thil thar tha zawk chawlut thei tura ngaihtuahna seng turin a chah. Aspirational District kan nihna chu a theih ang anga hmang tangkaia hmasawnna tur kan neihahte hmasawn tum zel turin a chah bawk a ni.

Pu Ronald Lalchhuanawma, Youth Commission Officer, MYC chuan Mizoram Youth Commission in thalaite'n khawvel zauzawk kan thlir theihna tura hma an lakna hrang hrangte a tarlang a, Mizo thalaite Central service-a kan luh theihna turin Aizawlah online coaching class hawn niin Staff selection Commission in Exam a buatsaih thinah coaching class Aizawl leh Lungleia buatsaih a nih bakah Sipaia kan mizo tlangval tam zawk an luh theihna turin physical leh written atan inbuatsaihna neihpui thin an ni bawk a, MYC summit leh Road show chu District khawpui tinah buatsaih tum a nih thu a sawi.

He summit leh Road show hawnna hun hi Pu Jacob Lalawmpuia, Addl. DC chuan a kaihruai a, Mamit khawpui chhunga Head of offices te, khawtlang hruaitu leh NGO-te an tel a ni.

MYC Summit leh Road Show 2018-ah hian stall hrang hrang 16 hawn a ni a, hengah te hian zawhna hrang hrang zawh theih niin heng zawhnate hi a hmunah hian chhan nghal an ni.