2431/2022-2023
Mizo Zirlai Pawl (MZP) Assembly vawi 66-na Darzo khuaa neih chu vawiin khan South Tuipui AC bialtu MLA leh Higher & Technical Education etc changtu Minister Dr R. Lalthangliana'n a hmanpui. Assembly thupui hi "Zirlaite - Zofate leh Zoram tan" tih a ni.

Vantlang inkhawm MZP Vice President Pu Andrew F. Lalramnghaka kaihhruaiah Dr R. Lalthangliana chuan khaw taima leh hrisel, mi ropui tak tak te lo chhuah tawhna Darzo khua ah MZP General Assembly nghah ani chu lawmawm tiin zirlai kalkhawmte chu Assembly chibai a buk a. Zirlai pawlte hi ram leh hnam hmasawn zelna tura pawl pawimawh berte zing ami ani tiin MZP chu chak taka a kal zelna turin hruaitute leh zirlaite duhsakna a hlan a ni.

MZP thil tumte zinga pahnih - Kuthnathawh uar leh chawisan; leh Mizoram leh Hnam tana mi tangkai ni tura zirlaite buatsaih; tih te chu a ngaih pawimawh zual thu sawiin Higher & Technical Education Minister chuan zirlai kalkhawmte chu thawh hreh neilo tur leh hnam dang thalaite tih theih te an ti ve thei a ni tih hriaa rilru huaisen taka hmalam pan turin a chah a. Khawvel changkang chho zelah kan ram economy te a changkangin a thang chho ve zel a, hei hian hna thar (job opportunity) tam tak a keng tel a, amaherawhchu thiamna tak tak neilo chuan heng hna te hi a hmuh theih loh a ni tiin zirlaite chu thiam tak tak tumna rilru nen tumruh taka inzir turin a chah a ni.

Tun hnaia Zofaten an ngaihven leh an ngaih hlut em em Youtube-a Darzo Khawhar In Zai chu chhuanawm a tih takzet thu sawiin bialtu MLA Dr R. Lalthangliana chuan Darzo YMA President hnenah Chawimawina citation leh thilpek a hlan a ni.

Vantlang inkhawm ah hian Pro Pastor K. Lalrammawia'n hunserh a hmang a. Pu Lalnunmawia Pautu, President MZP pawhin thu sawiin zirlai kalkhawmte chu ram leh hnam vei tur leh an thiamna leh an theihna te ram hmasawnna tura hmang tangkai turin a fuih a. Mizoram sawrkar scheme leh hmalakna pawimawhte leh kan state budget te pawh lo zirchiang ve a, ram hruaitu tha tak la ni thei tura inchher hriam turin a fuih a ni. Pu Jacob Lalmuanpuia, General Secretary, MZP in MZP inrelbawl dan leh hmalakna tlangpui report a pe a ni.

MZP Assembly Vawi 66-na hi nimin October ni 25,2022 ah bultan niin nizan khan Palai Lawmna Inkhawm neih a ni a. Palai 800 chuang telin tukin khan palaite hian Darzo khua ah faina hnatlangpui an thawk a ni.

Mizo Zirlai Pawl hi October ni 27,1935 ah din niin pawl thupui chu "Tanrual hi chakna"tih a ni a. Tun dinhmunah MZP hnuaiah Headquarters 13, Sub-Headquarters 47 leh Branch 102 a awm mek a ni.