Vawiin khan Mizoram State Rural Livelihoods Mission (MzSRLM) Governing Board meeting vawi 6-na chu Rural Development Minister Pu R Lalzirliana kaihhruaina hnuaia New Secretariat Conference Hall-ah neih a ni. Meeting ah hian Parliamentary Secretary Lt. Col. (Retd.) ZS Zuala, Pu Lalrinliana Fanai, Commissioner, Rural Development Department leh Finance, Industries, Agriculture, Horticulture, AH & Vety., leh Social Welfare Department aiawhte an tel a ni.

Meeting-ah hian Governing Board meeting vawi 5-naa thurel bawhzui dan an thlir ho. National Rural Livelihoods Mission (NRLM) Mizorama changtlung zawka MzSRLM in a kalpui theih nan thingtlang khawlian ‘Census Town’ a, Rural Development Department scheme kalpuina hmunah te NRLM hi kalpui ve tura pawm a ni a. Champhai leh Mamit District a RD Block 7 hnuaia, Cluster pakhat theuh a, NRLM kalpui ani ve thei nan Phasing Plan siam rawtna pawh meeting ah hian pawm a ni bawk.

NRLM hi Sawrkar Laipuiin SGSY thlakna tura Flagship Programme a duan niin MzSRLM hian NRLM hi Mizorama District pahnih – Serchhip leh Kolasib ah te an kalpui mek a, a tahtawlhin 2018 thleng Mizoram pum tuam an tum. NRLM in tum ber chu thingtlanga Self Help Group (SHG) lo ding tawh sa sawhngheh leh an inthlunkhawmna (Federation) siam sak a, eizawnna nghelnget an neih thei nan hma lak a ni.

Pilot Project atan hian District pahnih – Serchhip leh Kolasib District-a RD Block pali – East Lungdar, Serchhip, Thingdawl leh Kolasib te chu Intensive Block atana thlan niin heng huamchhunga khaw 25 ah te kalpui mek a ni. Heng khua ah te hian SHG 697 siam a ni tawhin chung zingah 315 chuan Grading paltlangin Revolving Fund pawh an dawng tawh a, SHG dang 110 Grading paltlang ve chu hun reilo tea Revolving Fund pek an ni ang. Heng Intensive Block pali ah te hian Primary Level Federation 25 siam a ni tawh a, hma lak mek a ni.