Vawiin khan Mizoram University academic building thar, School of Earth Sciences & Natural Resources Management (SES & NRM) chu Mizoram Governor Lt.Gen.(Rtd) M.M.Lakhera, PVSM, AVSM, VSM-in a hawng a. Hawnna inkhawmah hian MZU Vice-Chancellor Prof.A.N.Rai hovin SES&NRM Dean Prof. H. Lalramnghinglova leh University hotute engemawzat an tel a ni.
 
 

Khuallian Mizoram Larsap chuan thu sawiin tunlai khawvelin a buaipui ber chu environment a ni a ti a, hetiang boruak, sik leh sa, thing leh mau enkawl dan tur leh an chanchin zirna in tha tak School of Earth Sciences & Natural Resources Management, Mizoram University hnuaiah ngei a awm thei ta chu a lawmawm hle a ni, a ti. Mizoram mipuite environment chungchangah fimkhur leh humhalh a tul zia zirtir turin he School-a zirlaite chu an pawimawh dawn a ni, a ti bawk. He School-a an zirtur subject  thenkhatte phei chu Mizoram sum leh pai dinhmun thleng khawih pha a nih dawn avangin sorkar pawhin a phurpui hle a ni tiin Larsap chuan zirlaite chu tumruhna nen thiamna tak tak chhar chhuak a, Mizoram tana an thiamnate chu a tangkai thei ang bera hmang turin a fuih a ni.

MZU Vice-Chancellor Prof.A.N.Rai pawhin thu sawiin hun reilote chhungin University building tam tak sak puitling a ni thei chu a lawmawm a ni, a ti a. Nakum December thla chhungin building zawng zawng sak zawh ngei an tum thu a sawilang bawk.

School of Earth Sciences & Natural Resources Management (SES & NRM) hnuaiah hian Department 6 an awm a, chungte chu - 1).Forestry, 2).Environmental Sciences, 3).Geology, 4).Geography & Resource management, 5).Horticulture, Aromatic & Medicinal Plants leh 6).Rural Development & Extension Education te an ni. Vawiina SES&NRM Building hawn thar hi University kaihhruaina hnuaiah CPWD-in Rs.6.72 crores senga an sak a ni a. Building zau zawng hi 6176 Sq.m. a ni a, Department hrang hrang tan Classroom leh Laboratory changtlung tak ruahman nghal a ni. School-ah hian Seminar Hall leh Conference Hall sak nghal a ni a, Department hrang hrang te hi October thla chhungin an insuan fel vek theih beisei a ni.
 
 

Attachment

  • Loading attachment...