Vawiin khan Mizoram Chief Minister ruahhmanna in Mizoram Youth Commission Chairman Pu Joseph Lalhimpuia leh Mizoram University Vice Chancellor Prof. K.R.S Sambasiva Rao te chuan MZU Southern Campus, Lunglei-a neih theih dan tur chungchang an sawi dun.

Prof. K.R.S Sambasiva Rao chuan Mizoram ah thla sarih vel lek ala awm thu leh, Chief Minister nena an inhmuh apianga CM in Southern campus a ngaihpawimawh zia a sawi thin avangin, hun reilote chhung a awm chung pawh a Southern Mizoram University campus neih theih ngei tura hma a lak thu a sawi a ni. He campus-ah hian MZU a la awm ngailo subject thar pahnih khat atang tala bul tan theih nise a duh thu Vice Chancellor hian a sawi a ni. Ministry of Human Resource Development-ah dilna thehluh tawh niin, hei hi bawhzui mek a ni a, Mizoram University-a a awm chhunga he Southern Campus hi din ngei a nih theih nan hma a lak zel tur thu a lo hrilh a ni.

Pu Joseph Lalhimpuia, Chairman, MYC pawhin Mizoram sorkar in a ngaihpawimawh avanga Southern campus nei tura theihtawp alo chhuah tawh thu sawiin, Lunglei NGO te pawh he Campus thar a awm theih nan hian an phur in, theihpatawp an lo chhuah tawh a; Hemi chungchang ah hian Ved Prakash, UGC Chairman pawh New Delhi ah amah ngeiin a lo hmuh tawh thu sawiin, lehkha pawh a thehlut tawh tih a sawi a, amaherawhchu a beisei angin hlawhtlinna an la neih mai loh thu leh, hei hi tih hlawhtlin thuai a nih theih nan chak taka hma la tur in a sawm a ni.

MYC Chairman chuan Vice Chancellor chak tak mai Mizoram University in a nei chu lawmawm a ti a, hun reilote chhunga MZU leh Mizoram thalaite tan Project 37 vel lai Ministry-ah a thehlut tawh te chu lawmawm a ti a. Mizoram University leh Mizo thalai te tana a hmalakna ah tangkaina a nei a nih chuan theihtawp chhuah a inhuam thu a sawi a. August thla chhung hian MZU Southern Campus chungchangah Lunglei tlawhdunna tur ruahmanna siam an tum bawk a ni.