Vawiin khan Mizoram University Acting Vice Chancellor Prof. Lianzela leh Registrar Pu Zothankhuma, IDAS te chuan Governor Lt. Gen. Nirbhay Sharma PVSM, UYSM, AVSM, VSM (Retd.) chu Raj Bhavan-ah an hmu a. Mizoram University-ah Vice Chancellor nghet dah a nih theih nana hma an lak tawh dan te an sawipui. 

Governor chuan Mizoram University chu India rama University tha berte zing ami a nih angin lehkha zir chu kan dah pawimawh hmasak ber tur a ni, a ti a. Zirlai naupangte lehkha zir nan boruak muanawm kan siam a ngai a ni, a ti. Vice Chancellor chungchangah Ministry of Human Resource Development (MHRD) Union Minister leh midang te nena vawi engemaw zat an lo in dawr tawh thu a sawi a. Tunhnaia New Delhi a zin pawh khan sawrkar laipuia hotute chu sawipui leh in, Vice Chancellor thlang tura hma lak a nih thu an lo hrilh a ni. 

Zirlai ti thuanawp zawnga thil duhawm lo a thlen loh nan zirlai leh zirtirtu te chu fimkhur turin a duh a. Vice Chancellor nghet pawh Mizoram University-ah dah thuai a beisei thu a sawi a ni.