Vawiin ah khan National Bank for Agriculture and Rural Development, Mizoram Regional Office, Aizawl chuan kumtin a lo buatsaih thin, State Credit Seminar, 2015 chu Bank hnathawkte tan leh Line Department te tan a huaihawt leh a. He hunah hian Pu Lalbiakthanga, Additional Secretary, Finance chu Chief Guest ah hman a ni.

NABARD buatsaih Credit seminar ah hian State Focus Paper, 2015-16 tlangzarh niin he Focus paper ah hian kum 2015-16 chhunga hmalakna hrang hrang atana Mizoram in sum a mamawh dan bakah heng hmalakna atana mamawh zat tur anga chhut lawk te sawi ho a ni a. NABARD in a chhutlawk dan chuan kum 2015-16 chhung hian Mizoram chhunga Bank awm ten loan Rs. 746.04 Crore a sem chhuak dawn a ni. Loan pumpui atanga chhut in 20%, Rs.152.26 Crore chu agriculture term loan, 19%, Rs.142.12 Crore chu Crop loan, 12%, Rs.86.47 crore chu Micro and Small Enterprise Sector (MSME) loan leh abak 49%, Rs.365.19 crore chu other priority sector loan atan then hran a ni. Kum 2014-15 chhunga loan semchhuah Rs.675.20 crore ai chuan NABARD in kum 2015-16 chhunga Mizoram a Loan sem chhuah tura a lo chhut lawk hi 10.49% in a tam zawk a ni.

Kum 1995-96 atang khan Mizoram chhungah Rural Infrastructure Development (RIFD) kalpui tanin hmalakna huang hrang hrang 31 ah project 197 thawh nan Rs.452.24 crore ruahman tawh in heng zinga project 161 hi thawh zawh tawh a ni a, Rs. 346.84 hman a ni tawh bawk a ni. RIFD hnuaia project hi thingtlang kawng laihnan te, tuithianghlim intur ruahman nan te, minor irrigation, Health, cold storage, animal husbandry, small hydel projects leh plantation ah te kalpui a ni.

NABARD chuan Mizoram chhunga district hrang hrang te zirchianna nei tawh in district pakhat chhung bik atana hmalakna tur leh ngaih pawimawh tur bik a ruahman a – Vawkvulh : District zawng zawng ah, Bawngvulh leh bawnghnute dehchhuah : Aizawl, Champhai, Kolasib leh Mamit ah, Wet Rice Cultivation (Buh hmun siam) : Champhai leh Kolasib ah, Sangha dil siam/ khawi: Champhai leh Kolasib ah, Oil Palm hmun siam : Kolasib leh Mamit ah, Thelret hmun siam : Lunglei ah, Coffee hmun siam : Lunglei leh Saiha ah te an ni.

Seminar paper in a tarlan dan chuan chuan Priority sector (ngaih pawimawh zualbik) ah kum 2012-13 chhung khan Mizoram ah loan Rs.369.42 crore pekchhuah a nih lain kum 2013-14 ah chuan Rs.289.73 crore ah a tlahniam dawrh a, hei hi a ngaihmawhawm thu leh enfiah vat ngai lai a nih thu sawiho a ni.

NABARD in a tarlan dan chuan kum 2013-14 chhunga Mizoram a mi pakhat zelin kum 1 chhunga a thawhchhuah chu Rs.74,920 a ni a, hemi chhunga State GSDP chu Rs. 5626.58 crore a chhut a ni. Mizoram mipui 60% hi loneih leh kuthnathawk a eizawng niin kum khat chhunga state mipui in eitur buhfai a mamawh 30% an thawk chhuak a ni. Horticulture hnuaia hmalakna atan hman theih ram 11.56 lakh h.a. ah 1.21 lakh h.a. chiah la hman tangkai a ni a, sangha dil siam theihna hmun remchang 4500h.a awm in heng atanga 18.75% chiah hman tangkai a ni. Mizoram ah chawhrualin kum 1 ah ni 250 chhung ni eng tha tak dawnsawn tur a awm a, he ni eng atang hian darkar 1 chhung in 200MW/Sq.Km zet solar power seng theih a nih thu tarlan a ni a, Mizoram Rural Bank atanga loan hmanga Solar unit la chhungkaw 264 chauh an la awm thung.

Seminar ah hian loan chungchanga harsatna awm thin tih ziaawm a nih theih nan Bank ten Line department nasa zawkin rawn thei se tih Line department aiawh ten an rawt a. Defaulter an tlem phah bakah recovery pawh tha zawka kalpui a awlsam an rin thu sawrkar hnathawkte hian an sawi a. Bankers leh Official meeting pawh tam zawka neih rawt a ni bawk. NABARD hotute chuan sector hrang hranga harsatna ti ziaawm tur leh hmasawnna tichak turin Bank leh sawrkar inkar a hrisel a ngai a ni an ti. Seminar hi Pu F.R. Marak, GM, NABARD leh Pu R.Sankar, Deputy GM, NABARD ten an kaihruai a ni.