3454/2023-2024

Khawzawl, 23rd January 2023: Vawiin khan Khawzawl DC Meeting Hall-ah National Bank for Agriculture Development (NABARD) leh North East Initiative Development Agency (NEIDA) tangkawpin Khawzawl District chhunga khaw pali - Khawhai, Chawngtlai, Neihdawn leh New Chalranga  - ‘Integrated Livelihood Promotion’ hmanga lo neih (farming) leh ran vulh (livestock) tanpuina an pek tur chungchangah inrawnkhawmna (pre programme implementation meeting) neih a ni.

Integrated Livelihood Promotion hi ‘Tribal Development Fund’ hnuai atanga ruahman a ni a . He project atan hian cheng nuai zahnih leh sawmpathum (₹2,13,74,500) ruahman a ni a. NABARD atangin cheng nuai za leh sawmthum paruk (₹1,36,58,500) hmuh a ni a, NEIDA lamin cheng nuai 52 (₹52,11,000) hmuh a ni thung ang. He project hnuaiah hian Chawngtlai, Neihdawn, Khawhai leh New Chalrang khuaa chhungkaw sawmli theuh ten thlai chi hnih - Dragon fruit leh Chana (Garden Pea) an ching ang a; Chawngtlai, Neihdawn leh Khawhai a chhungkaw sawm theuh ten ar an vulh ang. 

Project hnuaiah hian thlai chin senso (Cultivation Cost), lei luang ral tur venna (Soil Conservation), tuihna tihpun (Water Resource Development) ran vulh senso (Poultry Development), hmanraw dahkhawlna (Custom Hiring Center), Entry Point Activity hmanga kuthnathawktute hahchawlhna hmun sakna tur te, thlai thar that zawng thliarna hmun (Grading Center), Training senso atan te, Project enkawlna senso tur te bakah Hriselna kawnga kuthnathawktute enkawlna tur te ruahman a ni.

Khawzawl Addl DC Pu Lalfakzuala chuan he hunah hian Integrated Livelihood Promotion chu thil tha tak nia a hriat thu a sawi a. Project chu kuthnathawktu ten hlawhtlin pui ngei se a duh thu sawiin, Khawzawl District chu kuthnathawk nasa khua an nih ang NABARD leh NEIDA te chu project dang tha zawk pawh District tan a rawn duang zel turin a ngen nghal  a ni.

Meeting-ah hian NEIDA aiawhte bakah Khawzawl Bawrhsap Pu K. Lalrohlua, Addl DC Pu Lalfakzuala, District Horticulture Officer Pu Lalnunpuia,  Agriculture Department aiawh, PHE aiawh te bakah Project kalpuina tur khaw pali - Khawhai, Chawngtlai, Neihdawn leh New Chalrang khawtlang hruaitute an tel.

Thutkhawmah hian Project-in a tum tlangpui te inhrilhhriatna PowerPoint presentation hmangin neih a ni a. NEIDA, Department aiawh leh khawtlang hruaitute hian hriat fiah loh lai te inzawtin, thawhho zel dan tur te an sawiho a ni.