4187/2024-2025

11th February 2025: Vawiin chawhma dar 11 khan Lorrain English School, College vaih, Siaha-ah National Deworming day 2025 hawnna hun hman a ni a, Pu T. Chatlua, Addl. DPC, Samagra Shiksha chuan khuallian niin he hun hi a hmanpui.

Khuallian chuan thu sawiin, Naupang te’n tha taka rulhuthlo an ei chuan thalai hrisel tak an ni anga chu chuan chhungkaw hrisel din turin a pui anga, chhungkua a hrisel chuan ram a changkang dawn a ni tiin school naupang kalkhawmte chu rulhuthlo ei hun ngaipawimawha tha taka ei turin a chah. 

Pu T Chatlua chuan rulhuthlo chu a thlawna dawn zingah malsawmna thlentu tha tak anih thu a sawi a, he damdawi hian a tha lo zawnga nghawng a neih loh avangin zirlai, zirtirtu leh nu leh pate pawhin a ei hun dik tak ngaipawimawh tlang se, ram pum ang pawha hriselna kawnga hma sawnna a nih tur thu a sawi bawk. 

Dr. Lalnunziri, Sr. CMO, Siaha District chuan he hun hi kaihruaiin National Deworming Day chu naupang kum 1 atanga kum 19 inkarin rulhut an pai lohna turin kum khatah vawi 2 (thla 6 danah) health department in an pek thin thu a sawi a, a, a ni (day) tak chu February 10 a ni a, remchan zawkna avangin vawiinah hman a ni tih a tarlang. Pu KH Lalrawngbawla, Health worker in kut silfai dan dik naupangte a zirtir bawk.

National deworming day hawnna hunah hian sorkar official-te bakah Lorrain school Principal leh staff te an tel a, naupangte hnenah rulhuthlo ei pawimawhzia leh a hnathawhte zirtirna pek anih rual hian rulhuthlo ei tir nghal an ni. National Deworming Day hi Dr. Lalrengpuii Ralte, Dy. CMO, Siaha District chuan lawmthu sawina neiin hun tihtawp a ni.