4372/2025-2026

Aizawl, 10th February, 2026 : Vawiin khan CMO, Aizawl East District chuan National Deworming Day February Round 2026 hawnna hun (launching programme) Chaltlang Anganwadi Centre-II ah an hmang a, he rulhut hlo pek beihpuithlak hian rulhut vanga naupang thisen tlachham leh hrisel lohna hrang hrang avanga an zirlai leh an thanchhohna kawnga harsatna thlen thei tur tih bo hi a tum a ni.

He hunah hian Pu Lalthanruma Sailo, Chaltlang Local Council Chairman chu khuallian niin, Dr Lalhlunpuii, Sr CMO, Aizawl East Districtin inkhawm a kaihruai a, Dr Lalbiaksangi Rawihte DRCHO chuan NDD chungchang a hriattur pawimawh bakah rulhut hlo ei pawimawhna leh ei dan tur dikte zirtirna a pe a ni.

Khuallian Pu Lalthanruma Sailo chuan sawrkar laipui hmalakna hrang hrangte mipui ten hman tangkai nachang hria a chhawr tangkai ngei tura inzirtir a tulzia a sawi a. National Deworming Day pawh hi sawrkar laipui hmalakna a nih angin mipui ten kan ngaih pawimawh a tul zia leh mipuite tana hriselna lama hmalakna pawimawh tak a nih thu a sawi a, he hmalakna hmang tangkai tur zawng zawng (naupang kum 1-19 inkar) ten rulhut hlo hi ei vek a that thu a sawi bawk.

He hunah hian Pi Lalrinmawii Khiangte, Secretary, Mizoram Independent School Association (MISA) chuan hriselna kawnga nu pawimawhna leh mawhphurhnate a sawi a, NDD pawimawhzia leh ram hriselna atana a tangkainate a sawi bawk.

Inkhawm kaihruaitu Dr Lalhlunpuii, Sr CMO hnen atangin rulhut hlo ei pawimawhna leh department dangte nena thawhhona tha neih a pawimawh thu ngaihthlak a ni bawk.

He hun hi Women and child Development, Education Department, PHE leh ANM School, Zemabawk staff ten an telpui a ni
Anganwadi naupangte rulhut hlo eitir nghal an ni.