Vawiin chawhma khan Govt. Mizo Higher Secondary School Mc Donald Hill-ah, Health Minister Pu Lal Thanzara hovin National Deworming Day hman a ni a. National Health Mission, Health & Family Welfare Department buatsaih a ni.

Pu Lal Thanzara chuan India ramah kum 2015 atang khan National Deworming Day (NDD) hi naupang leh zirlaite rulhut laka an fihlim theih nan kalpui a ni tiin a hlawknate hmuh anih hnuin February 2016 atang khan hman chhunzawm alo ni ta a ni, a ti a. National Deworming Day (NDD) hian a tum ber chu rulhut pai vanga natna hrang hrang thleng thei bakah thisen tlakchhamna  leh naupang than thu um bo te anih thu sawiin kum 1 – 19 inkar te tan kum tin vawi hnih rampum huapin a ruala rulhut-hlo ei tirna hun hman thin a ni, a ti a. Mizoramah pawh February 2016 khan hman tan niin round hnuhnung ber February 2017-a neihah khan naupang sikul kal leh kallo 96% laiin he damdawi hi an ei thu tarlang a. Health Minister chuan zirlai kalkhawmte chu fuihin rulhut pailo tura kan tih theih awlsam tak tak te chu kut silfai that te, thlai leh thei ei tur silfai that te, tui thianghlim in te, ekin tha leh thianghlim tak a inthiar te, eitur khuh that te leh in leh a vel vawnfai te a ni, a ti a ni.

National Deworming Day (NDD) hi Mizoram District zawng zawngah a ruala hman niin sikul kal leh kallo, sawrkar leh private sikulte pawh a huam a. Kum khatah tum hnih hman thin a ni. Rulhut  damdawi Albendazole hi Sikul-ah leh Anganwadi Centre (AWC) ah te a thlawnin a Ni ruat bikah hian ei theih a ni a. August Ni 17 ah hian Mop Up Day neih leh tur niin hemi Ni ah hian damdawi hi  sem a ni leh dawn a. National Centre for Disease Control (NCDC) in a zir chianna ah Mizorama rulhut pai thei dinhmuna ding naupang (Soil Transmitted Helminth Prevalence) chu 51%  a ni.

He hun hi National Health Mission Director Dr. Lalrozama, IAS chuan a kaihruai a. Govt. Mizo Higher Secondary School, Aizawl Principal Pu Lalthanzama leh Home Mission School, Aizawl Principal Pu Lalthlamuana ten thu an sawi a. Reproductive and Child Health (RCH)  State Program Officer Dr. Hmingthanmawii chuan lawmthu sawina in hun a khar a. Health Department bakah School Education Department, Social Welfare Department, Rural Development Department leh Public Health Engineering Department thawhhona hnuaia National Deworming Day hi hman a ni.