3844/2024-2025

Siaha the 16th January 2024: Vawiin chhun dar 12 khan DC Mini Conference Hall, Siaha-ah District Hub for Empowerment of Women, Women & Child Development, Siaha District bultumin "National Girl Child Day-2025" hawnna leh Beti Bachao Beti Padhao kalpui tan atanga kum 10 tlin lawmna hun hman a ni. Kumin National Girl Child Day thupui chu ‘Empowering girls for a bright future’ tih a ni.

Pu VL Hruaizela Khiangte, Deputy Commissioner, Siaha District, Siaha chuan "National Girl Child Day-2025" hawnna neiin thawktute inpekna ropui a tih thu a sawi. Thawktu kalkhawmte fuihin Pu VL Hruaizela Khiangte chuan Naupang chunga hleilenna chu a lang leh lang lovah pawh a hluar hle nia a hriat thu a sawi a, a tuartu chhungte pawhin a titu chu kan hmelhriatte emaw thenawmte emaw an nih vang maia FIR thehluh a ni lo thin chu pawi a tih thu a sawi. A titu chu kan huat viau vang emaw a chhiatna kan duhpui vang emaw ni lovin midangin an tih chhunzawm ngam loh nan leh hmeichhe naupang hmakhua ngaih vang zawkin dan anga hmala theitu hnen pan nachang hriat a tul thu a sawi. Naupangte humhim nan Mizoram chhunga pawl hrang hrang (MCHP, LWA, MHIP) te pawhin pheikhai rual taka an thawhho chhunzawm zel a beisei thu DC chuan sawiin mi dikna chanvo zahsak tur a ni a, dikna chanvo an nei a ni tih pawh la inhre lo naupang dikna chanvo chu mi tinin kan hriatsak a, kan humhim sak tur a ni a, midang la hre ve lote hnenah pawh zau taka puansak tur a ni tiin thawktute chu anmahni pantu naupang leh an chhungte thahnemngai taka counselling pe thin turin a chah bawk.

Pi B Zisia, District Mission Coordinator, DHEW, Siaha chuan National Girl Child Day-2025 hman dan tura an inruahmanna hrang hrangte sawiin, hemi pual hian India Republic day Siahaa hman turah Zirlai titha chawimawina hun an hman dawn bakah January 24, 2025-a Siaha khawpui chhung hospital-a naupiangah hmeichhia an awm chuan citation leh tangkafai an hlan dawn a, Local Girl Champion pakhat thlang chhuak tura an in buatsaih mek tawh thu a sawi bawk.

Vawiin hun hi Pi Hepaw Hlychho, CDPO-in a kaihruai a, Pi Imelda Zomuanzuali, Centre Superintendent, One Stop Centre, Siaha kaihruaina hnuaiah Pledge sawi rualna hun hman a ni bawk. Pu KC. Robin Thahmo, Specialist in Finance Literacy, DHEW, Siaha chuan lawmthu sawiin programme hi khar a ni.