Vawiin khan National Health Mission hnuaia Program Officer leh Finance staff-te tan ni hnih (August ni 28 – 29) chhung awh tur National Health Mission sum hman dan training neih tan ni. He training hi Sorkar laipuia Ministry of Health and Family Welfare hnuaia National Health Mission leh Mizoram National Health Mission, State Program Management Unit (SPMU)-te buatsaih a ni a; State Level Program Officer leh Finance Manager-te bakah District tin atangin Chief Medical Officer leh an team-te an tel a ni.

Training hawnna inkhawm, Dr. T. Lalhmangaihi, Joint Mission Director, National Health Mission kaihruaiah hian Dr. Rohmingthanga Ralte, Director, Health Services chuan thu sawiin, National Rural Health Mission tih thin chu a tir atang tawha vawiin ni thlenga sum hman leh vawnfel chungchangah chinfel ngai tam tak a awm thin avangin, he training hmang hian National Health Mission Mizoram chuan nasa takin hma a sawn a beisei thu a sawi a ni.

Training hmanpui tur hian New Delhi atangin Pi Kavita Singh, Director (Finance), Ministry of Health and Family Welfare leh Pu RK Thapar, Under Secretary (Finance), leh an team te an lo kal a.

Pu R.K Thapar chuan Mizorama National Health Mission kalpui dan leh sum hman dan tur chungchangah siamthat ngai leh hmasawnna tur chungchang te sawiin, sum leh program tha taka kalpui a pawimawh thu te, sum a lapse loh nana State Sorkar leh abikin Finance Department ten tihtur pawimawh tak an neih thute sawiin, 12th Finance Commission chhunga NHM hmalak dan tur tlangpui te a tarlang a ni.

National Health Mission kalphung hi 12th Finance Commission hnuaiah tih danglam a ni nual a. Funding pattern leh district thuam dan chungchangahte leh NHM hnuaia hnathawh peng hrang hrangte chak zawka an kal theih nan District Health Society-te chungah thuneihna sang zawk leh inenkawl dan phung chak zawk ruahmanna siam a ni.