Vawiin khan Public Works Department, Highway  kaihhruaina in National Highway -54 a traffic jam nasa zual tih ziaawm nan a highway dipdaltu leh ticheptu endik hna thawh a ni a. He hun hi Pu Lalzawmthanga, EE, PWD in a kaihruai a, DC Aizawl, SP Aizawl, SP Traffic, PWD Highways, PWD Road Protection Squad, I&PR atanga aiawhte an tel a, Bawngkawn, Chaltlang Lily Veng, Edenthar, Chanmari West leh Hunthar veng Local Council hruaitute leh NGO a hotuten an tawiawm bawk a ni. 

Pu Lalzawmthang, EE, PWD chuan,” Traffic jam hi Department pakhat emaw, veng pakhat emaw in a chinfel theih a ni lova, Sawrkar leh mipui thawh hona leh tanrualna nen lo chuan kan hlawhtling mai dawn lo a ni,” a ti a,” Kan kawngte hi dim thiam ila, dipdal zawnga khawsak loh hi Traffic Jam tih ziaawm nana hma kan lak ve theuh theih na a ni,” a ti bawk.

Vawiin hian Bawngkawn atanga Hunthar Veng inkara NH-54 endik hna ngawrh taka kalpui a ni a, kawng tichep zawnga motor te leh lian park, National highway hnaih lutuk a insak, Sumo leh Taxi stand, Motor Silna, Workshop leh Black topping thleng rat a dawr siam te endik niin hmun 73 chhinchhiah a ni a. Heng hmun neitute hnenah hian kawng dipdal lo tura hriattirna lehkha pek vek anni bawk a ni.

Ni 15, May, 2019 hian Rangvamual atanga Lengpui inkar endik hna chhunzawm a ni ang.