3915/2024-2025

Dated Kolasib 22 January, 2025 : Vawiin chawhnu dar 2:00 khan Kolasib Deputy Commissioner Pu Robert C. Lalhmangaiha kaihhruaina in National Highway kawngpui siam mek chungchangah chak zawka hmalak a nih theih nan thutkhawmna neih a ni.

He thutkhawmna ah hian National Highway 306 & 06 kawng siam meka hmalakna kal mek chu thlirhona neih a ni a. Kolasib DC chuan Vairengte - Bilkhawthlir leh Kolasib-Kawnpui inkar kawng siamtu NHIDCL hnuaia Balaji Construction-te chu ruahmanna awm tawh angin anmahni chan chin  Black Topping chu March ni 31, 2025 a zo fel hman turin a chah a. Fur khawchhia a lo thlen hma ngeia kawngpui siam hna hi zawhfel a nih loh chuan mipuite bakah a kawng siamtu Company-te tan pawn harsatna lian zawk a awm thei dawn tih a hrilh a. Bilkhawthlir - Kolasib leh Kawnpui- Khamrang inkar enkawltu Mizoram PWD pawh mipui harsatna hria a an hmanraw neih ang anga hma la turin a ngen bawk a ni.

He thutkhawmna ah hian kawngpui chiat avanga harsatna an tawh avanga inzawmkhawm pawl thenkhatte'n lungawi lohna an thlen te chu ngaihtuah hona neih nghal a ni bawk a. DC Kolasib chuan he kawngpui siam mekah hian mipuite chu a siamtute tan harsatna siamsak lo turin chah a, kawngpui tha tak siam a nih theih nan Sawrkar leh a siamtute chuan an theihtawp an chhuah a ni tih hria a, zaidawh taka awm turin a ngen bawk. Pawl anga lungawi lohna lan tirna a awm pawhin, mipui leh khawtlang nunphung tibuai lo zawnga tih lan ni thei se tiin a ngen a. National Highway dangchat zawnga hmalakna emaw mipui nunphung tibuai zawnga hmalakna awm lo se a duh thu a sawi bawk a ni.

He hunah hian Kolasib Superintendent of Police Pu David H Lalthangliana pawhin thusawiin kawng siam hna chak leh tha taka kalpui a nih theih nan lirthei kal dan vilpui turin leh a tul anga tanpui turin Kolasib SP Office chu an in peih reng thu a sawi bawk.

He thutkhawmna ah hian Kolasib DC leh SP bakah Kolasib Addl. DC, EE PWD(Mizoram PWD) ,NHIDCL leh Balaji Construction-a thawktute,Sub-Hqrs YMA leh Joint Action Committee Mizoram Truck Owners Association aiawhte an tel thei a ni.