Vawiin chawhnu dar 2:00 khan Pu J.H. Rothuama, Land Revenue & Settlement Minister chuan Revenue Directorate ah National Land Record Modernisation Programme (NLRMP) a hawng.

Minister chuan Revenue department hnuaia a thawktute chu midangte tana malsawmna ni turin mahni dawhkanah leh hna theuhah rinawm taka thawk turin a chah a. Hmanlai atanga ram leilung chhinchhiah fel lo leh hnathawktu tlemte rinawm loh avanga Revenue department hming chhe tawh chu siam tha tura theih tawp chhuah turin a sawm a. Tuna thawk mek tu ten dik tak leh fel taka an thawh chuan nakina lo la kal leh zel turte pawhin an hna theuh te dik tak leh fel takin an rawn chhunzawm ve dawn a ni, a ti.

NLRMP atan hian thawktu hrang hrang 8 lak thar an ni a. Survey hmanrua changkang tak tak DGPS - 2; SGPD - 10; Total Station - 25; Laptom - 25 leh hmanraw dangte lei a ni.

11th Five Year Plan hmalam ah kha chuan Revenue Department hian thuang thumin Land Record Project a kalpui thin a. Chung project te chu : 1) Strengthening of Revenue Administration (SRA); 2) Updating of Land Record (ULR); 3) Computerization of Land Records (CLR).

11th & 12th Year Plan (2008 -2017) ah hian heng Project pathumte hi kaikawpin Project pakhat a kalpui tur a lo ni ta a. National Land Record Modernisation Programme (NLRMP) tih a lo ni ta a. NLRMP hi India rampum puiah state zawng zawng in a in ang tlang a hman tur a ni.

Tun dinhmunah NLRMP hmangin Lunglei District ah bultan a ni a. Lunglei District-ah NLRMP atana Approved Amount chu Rs. 539.53 lakh a ni a. 1st Instalment ah Rs. 323.72 lakh hi central in a rawn pechhuak tawh a. Mizoram state share Rs. 32.00 lakh hi released a ni tawh bawk a. Central atang hian Rs. 161.85 lakh beisei leh mek a ni a, state share Rs. 21.95 lakh hi dil mek a ni bawk.

He NLRMP hawnna ah hian Pu R.L. Rinawma, Principal Secretary, Revenue bakah officer dangte leh Revenue staff te an tel tha hle a ni.