Thian duh tak te u,
Vawiin November 16, National Press Day, 2015 hmanna huna lo kalkhawm zawng zawngte chibai ka buk a che u.
November ni 16 - hi India rama chanchinbumite Zalenna leh pawimawhzia tilangtu chhinchhiahna pawimawh a ni a, Chanchinbu thiltithei tak hian a mawhphurhna hlenchhuak turte, nawrna leh vauna avanga an buai mai lohna tura Press Council of India in hna a thawh tan ni a ni. Khawvel hmun hrang hrangah Press leh Media te awm bawk mahse, Press Council of India hian tuma khawih buai lohva mahni thu a chanchinbu mite an din theihna tur leh an zalenna humhim turin State hmanruate chungah pawh thuneihna a nei hial a ni.
Kum 1956 ah Press Council of India a lo din theihna tura rawtna thlentu Press Commission hmasa ber chuan Journalism ethic tun dinna tur tha ber chu he industry nena inzawm theihna nei Statutory authority din hi a ni a tih hria-in he mi kal zelah hian November 16, 1966 khan Press Council of India din a lo ni ta a ni. Hetiang hi a lo nih tak avang hian November ni 16 hian chanchinbumite zalenna leh mawhphurhna sanzia a tilang chiang hle a, chu chu hrerengin keini pawhin he ni hi kan hlut hle tur a ni ang.
Press Council of India hian hlauhna leh duhsak bikna tel lova media te’n an tihtur an tih theih nan Print Journalist te tan bik National Award chi hrang hrang a siam a. India ramin Journalist a neih ropui ber zinga mi, Raja Ram Mohan Roy hming chawiin Raja Ram Mohan Roy National Award for Excellence in Journalism a siam chuan Citation, Plaque leh sum ` 1,00,000/- (Cheng nuai khat) a keng tel a. Hei bakah hian Rural Development Reporting, Investigative Journalism, Photo-Journalism leh Best Newspaper Art ah te Award siamin Plaque, Citation leh pawisa fai ` 50,000 (Cheng sing nga) a keng tel bawk a ni.
National Press Day hi kum 1997 atangin kumtin thupui hrang neiin hman thin a ni a. Kumin 2015 pawh hian Thupui, “The Impact and Import of Cartooning and Caricature as a medium of Expression of opinion,” tih a ni.
Cartoon leh a nuihzatthlak zawnga lemziak, a tak an na nei si - caricature an tih te hian chhiartu mipuite ngaihtuahna kaihruaiin thu sang tam tak ziakin an sawifiah sen loh kha midang rilru chawk hlim chungin fiah takin a puang chhuak thei a, Political Cartoon te hi a hlu bikin hriatreng a awl hle a, tunlai thil thleng nena in mil tak, an sawi tum fiah taka kawk chunga ziahte hian thinlung nat zawkna tur a ken tel fo rualin a chhiartu mai ni lo an ziak chhana te ngei pawh nui lo thei lovin a siam fo thin a ni.
Chuvangin Cartoon leh Caricature ten tunlai khawvela hna a thawh dan leh mahni ngaihdan sawi chhuak tura mihring in zalenna a neih (Freedom of Expression) hmanraw pawimawh anih dan chungchanga sawihona neih chhunzawm zel anih theih nan Press Council of India chuan Press Day Deliberation 2015 chu Cartoonist lar, R.K. Laxman leh Rajinder Puri te hriatrengna atan hetiang hian a lo buatsaih ta a ni.
Vawiin National Press Day kan hmanna niah hian Chanchinbumite, thuthar thehdarhna kawng hrang hranga hmalatute hian ram chhunga mi chengte hmasawnna tura ke an penna kawngah mawhphurhna sang tak in nei ani tih in hriat ka duh em em a ni. Mi zawng zawng hi dan hnuaiah kan leng vek a ni tih hria-in kan zalenna neihte mite tibuai zawnga hman a rem lova, a tha zawnga mite kawng kawhhmuhtu, zirtirtu ni theuh turin kalkhawmte a chah a. Tunlai khawvelah hian thuthehdarhna hmanrua chi hrang hrang, facebook, whatsapp, etc. a lo chhuak mekin mi tam takin kan hmang a, hei hi a tha zawng a hman chuan a tangkaiin a hlu em em a, a tha lo zawnga hmang kan tam ta lutuk erawh hi chu a pawi takzet a, hemi tireh tur hian kan dikna leh chanvo hrereng chungin theihtawp kan chhuah a tul hle a ni.
Thuthar thehdarhtute hian kan hnamzia (culture) vawnhimna kawngah pawh mawhphurhna thui tak kan nei a, tawngkam hman danah te, Mizo tawng ziak dik chungchangah te mite zirtirtu kan ni tih kan theihnghilh loh a tha a, a bik takin kan ngaihdan (idea) kan pholan theih ve na Editorial Column hi a bik takin Print Media te’n kan hman tangkai a Editorial kan ziah uar deuh deuh a pawimawh a ni.
National Press Day 2015 hmangtu zawng zawngte kan thiamna leh finna te ram leh hnam a lo din chhuah theih nana hmang turin ka ngen che u a, duhsakna sang ber ka hlan a che u.
