Vawiin khan Mizoram Remote Sensing Application Centre (MIRSAC) chuan Directorate of Science & Technology Office, New Secretariat Complex-ah ‘National Remote Sensing Day 2017’ an hmang a. Planning (Science & Technology) Minister Pu Lalsawta’n a hun hi hmanpuiin MIRSAC-in an neih thar Unmanned Aerial Vehicle (UAV) thlawh chhin tir tur a vailiam.

National Remote Sensing Day lawmna inkhawm Dr R.K. Lallianthanga, Chief Scientific Officer & Member Secretary, MIRSAC kaihhruaiah Khuallian Pu Lalsawta chuan thusawiin Mizoram sorkar hnuaia department 49 awm zingah Science & Technology Department mipuite hriat hlawh viau lo mahse vansang lam thiamna hmangin ram tan nasa takin hna an thawk a ni, a ti a. Ram hmasawn tur chuan leilung hausakna chi hrang hrang dinhmun hriat chian a ngai a, heng zawng zawng hi vansang atangin chiang takin Unmanned Aerial Vehicle (drone tia hriat lar) hmang phei chuan a chiang lehzual a, ram leilung hausakna zira ruahmanna siam chu a hlawhtling thin a ni, a ti. Hetiang thiamna neia hmalatu MIRSAC-a thawktute chungah lawmthu sawiin sorkar department hrang hrangte pawhin MIRSAC data hi hmang tangkai turin a chah.

Chief Scientific Officer & Member Secretary, MIRSAC Dr R.K. Lallianthanga pawhin thu sawiin National Remote Sensing Day hman a nih tan dan tlangpui tarlangin India Scientist ropui, Dr Vikram A. Sarabhai piancham denchhena Dept of Space hnuaia ISRO Centre hrang hrangin kum tin August 12-a an lawm thin a ni, a ti. Mizoram-ah chuan hemi ni hi inrinni a nih avangin August 11 -ah lawm a nih zawk thu a sawi a. India ramin vansang lam thiamna kawnga tun dinhmun a thlen theih chhan chu Dr Vikram A. Sarabhai thawhrah a nih thu leh Dr Sarabhai chu 'Father of Indian Space Programme' ti hiala hriat a nih thu a sawi bawk.

Principal Scientist, MIRSAC Dr Lalnunsiama Colney chuan Remote Sensing & GIS thiamna hmanga Mizoram chhunga an hna thawh dan powerpoint hmanga entirin sawifiah a. India ram hian Remote Sensing Satellite hi 23 a kap chhuak tawh a, heng zing 9 chuan an hnathawh hun chhung an hmang zo tawh a, tunah hian Satellite 14 in hna an thawk mek a. Remote Sensing & GIS hian sum leh pai seng tlem zawk leh rang zawka hmasawnna hna thawh mai bakah a vil zui hna thlenga langtlang leh chiang zawka thawh a nih theih thu a sawi a. Tunlai khawvelah chuan he technology hi hman uar ber pawl a ni a, tunah phei chuan Unmanned Aerial Vehicle (UAV) hmangin engkim chiang taka hmuh leh hriat theih a nih tawh thu leh MIRSAC pawhin pakhat a neih thu a tarlang tel bawk. Remote Sensing leh GIS thiamna hi khuarel chhiatna laka lo inven leh hmachhawn dan tura hma lo lakna atan bakah chhanchhuah hna thawhna kawngah pawh a tangkai hie thu a sawi bawk.

Pu C. Vanlalengkima, Scientist chuan tun hnaia Unmanned Aerial Vehicle (UAV), MIRSAC in a neih thar chu entirin a hnathawh theih dan te, thlalakna tha dah a nih chuan chiang leh tha zawka hman tangkai a nih theih dan tur a sawi a. UAVhmanga thlalakte chu Computer-ah Khuallian hovin thlir nghal a ni.

Pi Hmingthanpuii, Senior Scientist, MIRSAC chuan kalkhawmte hnenah lawmthu sawiin MIRSAC in database an neihte hi Department hrang hrang ten an mamawh ang zela hman tangkai theih a nih thu a sawi. Vawiin hun hmanah hian sorkar department hrang hrang official te, college/HSS zirtirtute leh zirlaite bakah Mizoram chhunga Science kawihhnawiha pawl hrang hrang aiawhte an tel a ni.